Lisensya sa pagnegosyo, namaligya
sutaon, sa di’ pa mobuhi’g puhunan
TAGBILARAN CITY, Bohol (PIA)— Dili lamang rehistro sa Securities and Exchange Commission (SEC) ang pangayoon kon may magpangaghat nga mamuhunan o mobayad sa unsa may gitanyag nga makahaylo.
Pahimangno ni SEC Information Officer Dion Drew Diano, ang registration sa SEC, nagmatuod lang nga anaa ang kompanya nga narehistro, apan kinahanglan pa usab nga ilang irehistro ang ilang negosyo nga gisudlan.
Magkinahanglan pa sila og secondary license para sa ilang securities, dason sa opisyal sa SEC Region 7 kinsa mianhi sa Bohol aon mapadayag ang pahimangno ngadto sa mga Bol-anon, taliwala sa nagkagrabe nga negosyo sa pangilad karon.
Ang securities nagpasabut sa gibaligya nga mga kabtangan sa kompanya o korporasyon, o mga sertipiko nga magpakita sa kantidad nga gipamuhunan sama na lang sa stocks sa kompanya.
Kini nga mga financial instruments gigamit sa mga corporasyon aron makatigum og dugang pang ipamuhunan samtang mang-aghat sa mga tawo nga mo-apil sa pamuhunan aron makaganansya.
Ang SEC maog magpatuman ug magregulate sa patigayon niining mga tanyag sa mga kompanya ug korporasyon ngadto na sa mga mamumuhunan.
Subay usab niini, may mga nagpasuroy sa mga kabalayan ug mga buhatan nga mang-aghat sa pagbuhi og puhunan, ilabi na kon pakapinan sa dagkong saad sa paspas nga ginansya, pasabut ni Diano.
Tambag sa SEC, pangitaa ang rehistro sa SEC, apil na ang pagsuta kon registrado ug lisensyado ba ang ilang pamaligya, usa kadokumento gikan sa SEC alang niini ang angay nga ikapakita.
Dugang pa, sa ingon niini nga pagpanghaylo sa puhunan, gidugang sa SEC nga bisan gani ang mga tawo nga gitugyanan sa kompanya o korporasyon nga magsuroysuroy aron magsolicit og puhunan, kinahanglan usab gihapon nga rehistrado sa SEC. (PIABohol)
KON HALOS DI NA KATUOHAN. Tambag sa SEC, kon may manghaylo og pamuhunan nga nagtanyag og daku ug paspas nga ganansya, ayaw pagdalidali. Sutaa daan kon dili ba kini ilad, matud ni Dion Drew Diano sa SEC. (PIABhol)
No comments:
Post a Comment