Ika-6 nga ‘DairyBox’

Tukoron sa Candijay

TAGBILARAN CITY, Bohol (PIA)— Tukoron didto sa Poblacion Candijay ang ika unom nga Dairy Box outlet, sa gikahinaman nga chocobao, agi og dugang suporta sa industriya sa dairy dinhi sa Bohol.

Gitunol ni Philippine Carabao Center (PCC) Chief Dina Loculan ang blue print nga plano sa pagtukod sa pasilidad nga mamahimo na usab nga kapalitan na, sa mga giproseso nga produkto sa gatas sa kabaw gikan sa PCC ug gatas sa baka nga gitabangan usab sa mga teknolohiya sa National Dairy Authority (NDA).

Ang ipabarug nga DairyBox sa Candijay, maoy labing bag-o, human sa Dairy Box sa PCC sa San Pascual, Ubay, sa Poblacion Ubay, sa Carmen, sa Libertad sa Tubigon ug sa Island City Mall sa Tagbilaran.

Ang Dairy Box usab sa Candijay, maoy ika 12 nga DairyBox nga gidumala sa PCC Ubay stock Farm, kang kinsa nga superbisyon, mingsakop sa Sugbo ug Masbate, matud ni Leinefe Libres Aton, information Officer sa PCC.

Kahinumduman nga giduso sa Bohol ang industriya sa pagpanggatasan human mitumaw ang kasayuran nga ang Pilipinas, nagsalig sa iyang panginahanglan sa gatas gikan sa gawas sa nasud, ug kay imported, daku ang kwarta sa goberno nga gigasto alang niini, nga mahimo na unta nga i-katiun ngadto sa mas importante nga panginahanglanon.

Sa pagkakita sa sitwasyon, gipasiugdahan sa Bohol pinaagi sa Office of the Provincial Veterinarian (OPV) ang mag-kombinsir sa mga mag-uuma nga may mga hayop, nga gatasan kini aron ikatampo sa paghulip sa nasudnong panginahanglan.

Karon, ang Bohol, makakuha na og sobra sa usa ka libo ka litro nga gatas sa kabaw ug baka matag adlaw.

Gikan sa mga mag-uuma nga naggatas sa ilang mga hayupan, kolektahon kini og paliton sa PCC ug NDA sa presyo nga P70 ang litro sa gatas sa kabaw ug P40 ang litro sa gatas sa baka.

Kini dalhon ngadto sa mga pasilidad sa PCC ug sa NDA aron ipaagi sa pasteurization, kuhaan sa mga sangkap alang sa mga nagkadaiyang panginahanglan sama sa keso, mozzarella ug gatas nga mao usab ang sahog alang sa mga produkto nga gibaligya sa matag Dairy Box.

Ang pagduso usab sa Bohol sa dairy industry, naghatag na sa mga mag-uuma sa dugang kita, may pipila na kanila nga mingkita og sobra sa usa ka libo sa usa ka adlaw, sa pagpamaligya sa ilang ginatas. (PIABohol)

IKA UNOM NGA DAIRY BOX. Gidawat ni Candijay Mayor Thamar Olaivar gikan ni PCC Center Chief Dr. Dina Loculan ang blueprint sa ika unom nga outlet sa gatas Bol-anon nga tukoron sa Candijay, samtang napakita nga nagkadaghan na ang inadlaw nga gatas nga masupply sa Bohol. Gawas sa mga produkto nga ibaligya sa DairyBox, ang gatas Bol-anon maoy gisaligan sa nutritional Feeding sa mga kabataan nga malnourished dinhi. (PIABohol)