NGCP, DENR ug LGUs milagda og kasabotan

alang sa proyekto sa pagpanalipod sa kinaiyahan

TAGBILARAN CITY, Bohol (PIA)--Isip kabahin sa mga inisyatibo sa pagpanalipod sa kinaiyahan, ang power transmission service provider nga National Grid Corporation of the Philippines (NGCP) misulod sa usa ka memorandum of agreement (MOA).

Uban sa Department of Environment and Natural Resources (DENR) ug pipila ka mga local government units (LGUs) sa lalawigan sa Bohol, ang NGCP milagda og kasabotan alang sa pagtukod ug pagmentinar sa 243 ka ektarya nga plantasyon sa kalasangan sulod sa tulo ka tuig.

Ang Presidente ug CEO sa NGCP nga si Anthony L. Almeda maoy nirepresentar sa kompanya atol sa MOA signing nga nagpasiugda sa pasalig niini sa pagsuporta sa mga paningkamot sa reforestation nga nagtubag sa pagpanalipod sa kinaiyahan ug pagpalambo sa komunidad.

“This MOA seeks to support reforestation and environmental sustainability efforts in the province. NGCP is always ready to extend its support to LGUs in their initiatives to protect the environment (Kini nga MOA nagtinguha sa pagsuporta sa reforestation ug environmental sustainability nga mga paningkamot sa probinsiya. Ang NGCP andam kanunay nga mohatag sa ilang suporta ngadto sa mga LGU sa ilang mga inisyatiba sa pagpanalipod sa kinaiyahan),” matud pa ni Almeda.

Si DENR Kalihim Raphael Lotilla milagda sa ngalan sa DENR, uban sa mga representante gikan sa Bilar Water and Sanitation Multi-Purpose Cooperative (BWSMPC) ug sa mga lungsod sa Batuan, Bilar, Catigbian, Sagbayan, ug Sierra Bullones.

Gawas sa pagpanalipod sa kinaiyahan, ang NGCP mitukod sa Cebu-Bohol Interconnection Project, nga nagsiguro sa lig-on nga suplay sa kuryente nga makapausbaw sa karon ug sa umaabot nga socio-economic nga pagtubo sa maong dapit. (ECB/PIA7-Bohol)

Ang paglagda sa MOA alang sa pagtukod ug pagmentinar sa 243 ka ektarya nga plantasyon sa kalasangan sa mga lungsod sa Bohol sulod sa tulo ka tuig gipangunahan nilang (L-R) Mr. Paquito D. Melicor Jr., ang Regional Executive Director sa DENR Central Visayas; Mr. Anthony L. Almeda, Presidente sa NGCP; Kalihim Raphael Lotilla sa DENR; ug Rizaleo C. Gahit, Chairman sa Bilar Water and Sanitation Multi-Purpose Cooperative (BWSMPC) ug gisaksihan ni Bohol Provincial Board Member Lucille Lagunay. (ECB/PIA7-Bohol)