Pagpangita sa 2025 4Ps Exemplary 

Children gibuksan na sa DSWD-7

TAGBILARAN CITY, Bohol (PIA)--Opisyal nang gibuksan sa Department of Social Welfare and Development Field Office 7 karong tuiga ang pagpangita sa Pantawid Pamilyang Pilipino Program (4Ps) Exemplary Children, usa ka tinuig nga pag-ila nga nagtumong sa pagpasidungog sa talagsaong benepisyaryong bata nga naglangkob sa pagkamaayo sa panimalay, sa eskwelahan, ug sa sulod sa ilang mga komunidad.

Ang pagpangita nagpasiugda sa mga bata nga labaw pa sa pagsunod sa mga kondisyon sa programa, nagsilbi nga mga modelo ug tigpasiugda sa kahimsog, edukasyon, ug responsable nga pagkalungsoranon.

Matud pa ni DSWD-7 Regional Director Shalaine Marie Lucero nga kini nga pagpangita labaw pa sa usa ka award diin usa kini ka pagsaulog sa potensyal sa atong mga bata nga mahimong ambassador sa positibong kausaban ug inspirasyon sa isig-kabata.

Ang kompetisyon bukas sa tanang 4Ps child beneficiaries nga nag-edad og 10 ngadto sa 14 anyos sa Oktubre 31, 2025. Ang mga nominado kinahanglan nga mga benepisyaryo sa programa sulod sa labing menos usa (1) ka tuig, compliant sa gikinahanglan nga pagtambong sa eskwelahan, may maayo nga academic standing, hingpit nga nabakunahan, ug nagpakita sa maayong pamatasan.

Ang mga nominado kinahanglang magpakita sa academic excellence, aktibong moapil sa co-curricular ug extracurricular nga mga kalihokan, ug magpakita sa mga talento sama sa pagkanta, sayaw, acting, essay writing, spoken poetry, poster making, o uban pang kompetisyon.

Ang mga lider sa komunidad, mga magtutudlo, mga asosasyon sa mga ginikanan, ug mga grupo sa simbahan gidasig sa pag-nominate sa mga takos nga bata. Ang mga interesadong nominador mahimong makig-coordinate sa 4Ps City ug Municipal Links (C/MLs) alang sa kompleto nga mga giya.

Ang mga mananaug sa probinsiya gikan sa Bohol ug Cebu magtigi sa regional level uban sa mananaog gikan sa highly urbanized nga mga syudad sa Sugbo (Cebu City, Mandaue City, ug Lapu- Lapu City). Ang regional validation ug judgement mosunod aron matino ang Central Visayas winner ug runners-up.

Sugod karong tuiga, mo-abante na ang mga provincial winners gikan sa Negros Oriental ug Siquijor nga makigtigi sa Negros Island Region (NIR).

Ang tanang provincial ug regional winners makadawat og ganting salapi ug certificates sa pag-ila.

Ang regional winner ug runners-up gikan sa Central Visayas maoy morepresentar sa rehiyon sa National Children’s Congress (NCC) ug mosalmot sa Araw ng Kabataan nga kasaulogan sa Metro Manila karong Nobyembre, dungan sa National Children’s Month. Makig-uban sila sa ubang mga sulondon nga mga bata gikan sa tibuok nasud.

Ang 4Ps mao ang flagship poverty alleviation program sa gobyerno nga namuhonan sa panglawas, nutrisyon, ug edukasyon sa mga bata nga nag-edad 0–18 gikan sa mga kabus nga panimalay. Inubanan sa psychosocial ug educational interventions pinaagi sa Pamilya Development Sessions (FDS), ang programa nagtumong sa pagtabang sa mga pamilya sa pagtukod og mas maayong kaugmaon. (ECB/PIA7-Bohol)

Opisyal nang gilusad sa DSWD Field Office 7 karong tuiga ang pagpangita sa Pantawid Pamilyang Pilipino Program (4Ps) Exemplary Children, usa ka tinuig nga pag-ila nga nagtumong sa pagpasidungog sa mga outstanding child beneficiaries nga naglangkob sa excellence sa panimalay, eskwelahan, ug sulod sa ilang komunidad. (DSWD)