Digital Ginhawa Loan Program gilusad sa GSIS

TAGBILARAN CITY, Bohol (PIA)--Ang mga kawani sa gobyerno nga nanginahanglan og bag-ong computer, tablet, o cellphone alang sa trabaho o pagtuon mahimo nang mo-apply sa GSIS Digital Ginhawa Loan, usa ka bag-ong gadget loan gikan sa Government Service Insurance System (GSIS) sugod Oktubre 10.

Ang programa nagtugot sa mga kwalipikadong miyembro nga mohulam og hangtod ₱60,000, nga bayran sulod sa tulo ka tuig, nga may ubos nga unom ka porsyentong interes matag tuig ug walay bayad sa serbisyo.

Ang mga aplikasyon dawaton lamang pinaagi sa GSIS Touch mobile app, nga nagsiguro sa paspas ug walay papel nga proseso.

Kun maaprubahan, ang mga kitaon direktang ma-kredito sa GSIS ATM account sa miyembro sulod sa usa hangtod tulo ka adlaw nga pagbangko pagkahuman sa pag-apruba sa awtorisadong opisyal sa ahensya.

Matud pa ni GSIS President ug General Manager Wick Veloso nga tumong sa loan nga himuong mas accessible sa mga miyembro ang mga digital tools.

Ang bag-ong loan program gitumong dili lamang aron matabangan ang mga miyembro nga mopalit sa mga mahinungdanong gadgets apan aron ma-awhag usab sila nga modungan sa digitalization sa mga serbisyo sa GSIS, nga karon ma-akses pinaagi sa GSIS Touch mobile app.

Mahimong gamiton sa mga miyembro ang app aron mag-aplay alang sa mga pautang, susihon ang mga talaan, i-update ang mga detalye sa contact, ug bisan nga mag-apply alang sa mga benepisyo sa pensiyon ug insurance, tanan sa usa ka sayon nga platform.

Gipadayon niini ang kalamposan sa GSIS Computer Loan Program nga igilusad niadtong 2020 sa panahon sa pandemya, nga napahimoslan sa kapin 355,000 ka miyembro ug nag-disbursed og kapin ₱10.67 bilyon.

Aron mahimong kwalipikado, angay silang aktibo sa serbisyo nga may permanenteng appointment, walay nag-ungot nga kasong administratibo o kriminal, ug walay na-default nga mga pautang sa GSIS (gawas sa mga pautang sa pabahay o computer).

Naghatag usab ang programa og Loan Redemption Insurance aron protektahan ang pamilya sa miyembro pinaagi sa pagbayad og utang kun ugaling mamatay sa panahon sa termino. (ECB/PIA7-Bohol)

Gi-awhag sa GSIS ang mga miyembro nga pahimoslan ang Digital Ginhawa Loan Program aron magpabiling konektado ug produktibo. Ubos niining gadget loan, mahimong mopalit ang mga miyembro og desktop, laptop, tablet, mobile phone, o bisan unsang gadget nga kinahanglan alang sa trabaho o eskwelahan. (GSIS/PIA)