Eastern Comms mihatag

Og Starlink sa Baunos ES

TAGBILARAN CITY, Bohol, (PIA)— Gitugyan sa Eastern Communications pinaagi sa Bohol Chamber of Commerce and Industry ngadto sa Baunos Elementary School sa San Isidro ang usa ka satellite internet package isip eskwelahan nga gisagop sa kompanya sa komunikasyon sa ilang Project Maasahan. .

Usa ka starlink satellite internet set, usa ka laptop ug usa ka tuig nga subscription alang sa tibuok eskwelahan, mga magtutudlo ug estudyante sa nahisgutang tunghaan sa San Isidro Bohol ang gidawat ni Aileen Coringao, head teacher ug principal sa nahisgutang tunghaan, atul sa membership assembly sa Chamber dungan usan sa Bohol Tourism Business Forum.

Daku kayo og ikatabang, matud pa ni Coringao, kay ang hilit nga lugar sa Baunos San Isidro, lisud na ang dalan, maglisud pa usab ang mga magtutudlo sa paghimo sa mga learning modules ug materials tungod kay wala silay magamit nga kasaligan nga signal sa internet.

Ang Baunos Elementary School, gawas nga girekomendar sa Department of Education ngadto sa Eastern Communications alang sa ilang Project Maasahan, ug kini usab ang gitudlo sa BCCI nagdto sa Eastern Communications nga ipasagop.

Ang Project Maaasahan sa Eastern Communications Philippines' usa ka programa sa paghatag og digital nga internet connectivity ug digital literacy ngadto sa 10 ka mga geographically isolated ug disadvantaged schools sa nasud.

Tumong niing ang pagsumpay sa haw-ang sa digital access sa mga nagtungha ug mga magtutudlo nga anaa sa mga hilit nga lugar, aron sila makagamit sa mga himan ug kahigayonan nga makalahutay diha sa kalibutan nga nagtikang na sa digital nga panahon. (PIABohol)

STARLINK PARA SA BAUNOS. Gitugyan sa Eastern Communications ang digital nga mga kahimanan ngadto sa Baunos Elementary School isip sinagop nga tunghaan aron solbaron na ang kawalay digital access niini sa internet dala s aka layo ug ka hilit sa ligar. Kauban sa Eastern Communications ang Bohol Chamber of Commerce and Industry. (PIAbohol)