Sa Muslim Congress 2025

Gob Aris nanawagan og

Pag-hiusa sa kalambuan

TAGBILARAN CITY, Bohol, (PIA)—Gipanawagan ni Gobernador Erico Aristotle Aumentado ngadto sa mga igsoong Muslim ang pagpakighiusa sa pagmugna sa Bohol nga puno sa paglaum, pagtuo ug oprtunidad, sa kasaulogan sa ika 8 nga katuigan sa pagtukod sa Bohol Muslim Community Peace Movement (BMC-PeM) nga gitiman-an sa Muslim Congress 2025 didto sa Bohol Cultural Center, Oktubre 22.

Sama sa akong kanunay nga ginaingon, wala’y biyaay, kay kita usa raman ka probinsya, aghat sa gobernador, kinsa nakakuha usab og pagsalig sa mga Muslim.

Sa pipila na ka katuigan, ang Bohol gipili na usab nga puy-anan sa baga nga mga Maranaw, Tausug, Badjao ug Maguindanao, samtang may mga gagmay pang tribu nga ania dinhi.

Matud ni Taha Malabi, president sa BMC-PeM, sa kagubot sa Mindanao, ang ilang mga pamilya kaniadto, mipili nga motapon sa Bohol tungod sa kalinaw ug kamaayo sa mga tawo dinhi.

Daghan sa mga Muslim nga dinhi na ikahimugso sa Bohol, dugang ni Malabi.

Sa atong mga igsoon nga Muslim, magkuyog ‘kita sa pagmugna og usa ka probinsya nga puno sa paglaum, pagtuo, ug oportunidad. We will make our province a symbol of tolerance, diversity, and prosperity, kay ang Bohol, mao man ang atong Yutang Natawhan ug Yutang Gihigugma, dayag sa gobernador.

Ang BMC PeM Inc. namugna usab niadtong 2017 human buot ipasalig sa mga Muslim nga sila na ang maneguro nga dili masamok og balik ang Bohol sa mga tapnas nga Muslim extremists.

Sa ika 8 ka tuig sa kapunungan, ang ilang Congress nga gipahigayon gitambongan mismo nila National Commission on Muslim Filipinos (NCMF)-Region 7 Acting Regional Director Hanifa Sultan, NCMF-Visayas Peace Building and Conflict Resolution Division Acting Chief Atty. Al-Emir Yusoph Balt, Tagbilaran City Muslim Women Association President Sister Amina Sacar, ug Gob Aumentado.

Human usab sa walo na ka tuig nga pagtukod sa paghiusa sa mga Muslim nga ania na nanimuyo sa Bohol, nabuksan na ang bag-ong sementeryo sa mga Muslim didto sa Subayon, Bilar, nga tanyag sa kagamhanan ni Aumentado.

Ang tema sa Muslim Congress mao ang, “Honoring our Past, Strengthening Bonds, Building a Peaceful Future.” (PIABohol)

USA KA BOHOL. Gitunol ni Gob Aumentado ang plake ngadto kang National Commission on Muslim Filipinos (NCMF)-Region 7 Acting Regional Director Hanifa Sultan kinsa mianhi sa Bohol pagsaulog sa ika 8 nga tuig sa BMC PeM, samtang iyang giawhag ang mga Muslim nga madayong makighiusa sa kalambuan sa Bohol. (PIABohol/CC)