Walay state of calamity

Nga i-deklara sa Bohol

TAGBILARAN CITY, Bohol, (PIA)—Walay state of calamity nga ideklara sa Bohol bisan nakasinati sa maka-ugpot nga paglinog niadtong Septembre 30.

Kini ang napalutaw didto sa Emergency Meeting sa Provincial Disaster and Risk Reduction Management Council nga gipatawag ni Gob Erico Aristotle Aumentado Oktubre 1, human dayun sa linog.

Didto sa tigum, gipadayag sa mga mitambong nga clusters sa DRRM nga minor lamang ang mga namatikdan nga mga kadaut sa linog, ug pipila lamang ka mga imprastraktura ang nakasinati og dyutay nga mga liki, apan dili ra kahadlokan.

Gani, walay nataho nga suliran gikan sa mga pantalan sa Bohol, wala usab kabalak-an nga mga eskwelahan gawas sa ginagmay nga mga namatikdang pagliki sa mga estraktura, nga dili usab angay ikabalaka.

Gipabantayan hinuon ni Gob Aumentado ang pagsaka sa presyo sa mga palitonon, apan walay rason, matud pa sa Department of Trade and Industry, kay wala may state of calamity.

Ang pagdeklara sa state of calamity makatukas sa mga pundo nga gitagana alang sa kalamidad, magpabuhi sa pagkontrolar sa presyo sa mga nag-una nga paliton, ug magpadali sa tabang ug pagpahiuli nga dala sa katalagman.

Ang pagdeklara sa state of calamity mao ray makapatugot sa mga LGUS sa paggamit sa Quick Response Funds, pagpangayo sa calamity funds sa mga ahensya ug pagpasayon sa pag-akses sa mga pahuwam.

Hinuon, mingtaho didto sa tigum ang Department of Public Works and Highways kabahin sa mga tulay nga naapektohan sa linug sama sa Calape-Panggangan, tulay nga nagdugtong sa Catigbian-Sagbayan didto sa Triple Union ug ang susihonon nga mga tulay sa Tagbilaran-Dauis.

Kasamtangan nga mga gagmay ug gaan lamang nga mga sakyanan ang maka-agi sa Tagbilaran Causeway bridge (Ambassador Suarez) sa Poblacion I ngadto sa Totolan, samtang temporaryong gisirad-an ang usa sa duha ka tulay nga nagsumpay sa Mansasa nagdto sa Poblacion Dauis (Borja Bridge).

Kay sirado pa ang puthaw nga tulay, adto na moagi ang mga gikans a Dauis ngadto sa Tagbilaran sa tuo nga lane sa tulay samtang ang wala nga lane, alang sa mosulod sa Dauis, matud sa advisory ni Engr John Paul Gascon sa DPWH 1.

Alang sa mga mga dagkong sakyanan, mahimong moagi sa Borja Bridge apan dili pwede nga magdugnag og tungtong sa tulay, mao nga kinahanglang mopagiya sa mga tinugyanan nga naa didto, dugang sa DPWH. (PIABohol)

ISIG PAMINAW. Namati si Gob Erico Aristotle Aumentado sa pagpasabut ni ENgr Nolan Evangelista sa PhiVOLCs sa epekto sa linug dinhi sa Bohol samtang gitaho sa mga ahensya nga mingtambong nga minimal lamang ang kadaut, mao nga walay ideklara nga state of calamity. (PIABohol)