LGUs gi-awhag sa pag-kumpleto sa evacuation sa

Nob. 9 samtang nagkaduol ang bagyong ‘Uwan’

TAGBILARAN CITY, Bohol (PIA)--Ang Department of the Interior and Local Government (DILG) niadtong Biyernes nanawagan sa mga local government units nga kompletohon ang preemptive o mandatory evacuation sa mga residente sa high-risk nga mga komunidad sa Domingo, Nobyembre 9, una pa ang posibleng pag-igo sa super typhoon sa Luzon.

Kini human gimando ni Presidente Ferdinand R. Marcos Jr. ang pagpataas sa pagpangandam sa pagtubag sa katalagman aron masiguro ang kaluwasan sa mga residente sa mga lugar nga mahimong maapektuhan sa umaabot nga tropical cyclone Fung-wong (international name).

Sa pahayag sa DILG, nanawagan sila sa tanan nga mga local chief executives sa pagkompleto sa pagbakwit sa mga residente sa mga lugar nga adunay peligro nga dili molapas sa Domingo. Matud pa nga ang sayo nga pagbakwit magluwas sa mga kinabuhi.

Gimando usab sa DILG ang pagpatuman sa no-sailing policy ug ang pagsuspenso sa turismo ug outdoor activities sa mga lugar nga delikado.

Gimandoan usab ang mga LGU sa pagpalihok sa mga ekipo ug mga personahe alang sa paghawan sa karsada ug pagsiguro nga walay babag nga agianan alang sa mga emergency ug relief operations.

Nag-ingon usab ang DILG nga ang padayon nga koordinasyon sa Regional Disaster Risk Reduction and Management Councils (RDRRMCs) ug real-time nga mga kampanya sa impormasyon sa publiko kinahanglanon, ilabi na sa mga komunidad nga bulnerable sa pagbaha, pagdahili sa yuta, ug pagdagsang sa bagyo.

Ang Philippine Atmospheric, Geophysical and Astronomical Services Administration (PAGASA) miingon nga si Fung-wong mahimong mosulod sa Philippine Area of Responsibility (PAR) sa ulahing bahin sa Biyernes o sayo sa Sabado ug tawgon sa lokal nga pangalan nga Uwan, ang ika-21 nga bagyo nga moigo sa nasod karong tuiga.

Mahimong paspas kining mokusog ngadto sa usa ka super typhoon sa dili pa mo-landfall sa Northern o Central Luzon sayo sunod semana. (ECB/PIA7-Bohol)

Gipahimangnuan sa DILG ang mga LGUs nga dili angay maghulat nga mograbe ang kahimtang anha pa sila molihok. (DILG/PIA)