238M PDRRM budget giduso

Alang sa pag-aprobar sa SP

TAGBILARAN CITY, Bohol (PIA)—Giduso sa Provincial Disaster and Risk Reduction Management Council (PDRRMC) sa Bohol ang P238,004,818 nga budget alang sa 2026 nga disaster and risk reduction management program, atul sa labing bag-o nga tigum niini Disyembre 9, 2025, didto sa Capitol Ceremonial Hall.

Ang kinatibuk-an nga budget, gihan-ay sa duha ka bahinan: ang 70% nga pre-disaster program ug ang 30% nga quick response fund, pasabut ni PDRRMC admin officer Tiara Lourdes Bulilan.

Sa Pre Disaster Program, miabut sa 166,603,372.81 ang pahat samtang P71,401,445.49 usab ang alang sa 30% Quick Disaster Fund.

Sa Pre Disaster and Mitigation P64,898,700 ang pahat alang sa prevention mitigation ug P101,701,672.81 ang alang sa Preparedness and Response.

Human gikapresentar ang budget ug sa pipila ka mga pangutana, giduso dayun kini alang sa pagpagawas og usa ka resolusyon sa konseho nga magpasa sa budget aron mahimo na kining opisyal alangs a 2026.

Segun sa balaod, ang mga local Disaster Risk Reduction and Management Fund (LDRRMF) magagikan 5% sa gibanabana nga regular nga kita sa mga lalawigan, syudad, kalungsuran ug barangay.

Niini, 70% ang gamiton alang sa pre-disaster preparedness (sama s amga bansaybansay, pagpamalit og gamit alang s apagluwas sa kinabuhi ug kabtangan, mga gamit sa buhatan ug mga tambal.

Dinhi usab kuhaon ang pundo alang sa upost-disaster response (relief, recovery), ug disaster insurance premiums, gawas pa sa ubang mga kalihukan nga magtampo alang sa DRRM.

Sa LDRRMF, 30% usab kinahanglang pahat alang sa Quick Response Fund (QRF) o pundo nga andam nga magamit kon may dinalian nga panginahanglan sa disaster relief ug recovery.

Kini nga budget, magkinahanglan pa usab sa pagtugot sa Sangguniang Panlalawigan, aron opisyal na nga magamit. (PIABohol)

DUGANG COMMS TOWER. Magpabarug ang Bohol ug dugang communications tower didto sa Banat-I aron magamit sa mas lapad nga operasyon sa Tarsier 117, segun sa pagat nga giduso sa konseho alang sa pag aproba sa SP. (PIABohol)