Barangay officials giaghat:

Bantayi, isumbong ang

Naghimo’g ilegal quarry

TAGBILARAN CITY, Bohol (PIA)—Gipanghingusgan sa Kapitolyo karon ang pag-aghat sa mga barangay officials sa pagtabang sa pagbantay aron dili malipat sa mga maghimo og illegal nga mga buhat, ilabi na sa pagkware.

Kini nga panawagan gipalanog ni Colonel Eduardo Malig-on, hepe sa Bohol Provincial Task Force (BPTF) nga maoy natahasan sa pagpatuman sa mga probisyones sa Bohol Mining Ordinance ilabi na niadtong mga probisyones alang sa may mga ginagmay nga quarry.

Ang BPTF nga anaa magbase sa Bohol Provincial Environment and Management Office mao usab ang nagpatuman sa mga mandatus sa Bohol Mineral Resources Regulatory Office (BMinRRO) kinsa natahasan sa pagdumala sa mga gitugot nga pag-quarry dinhi sa Bohol.

Gihangyo sa BMinRRO ang mga barangay officials nga hiugtan pa ang pagbantay, labi na sa mga daan nga quarry sites, kay kini kasagaran nga gamiton. Gawas pa, ang pagkapakyas sa pagsumbong sa illegal nga operasyon, makaalkanse sa barangay.

Segun sa Philippine Mining Act, ang mga gagmay nga quarry, nga dili na molapas pa sa 5 ektaryas, mahimo nga maka-operate sa pag quarry apan giniyahan sa local nga kagamhanan.

Bisan pa man nga kini adto magkuha og mga pagtugot gikan sa Department of Environment and Natural Resources ug sa gipandongan niini nga Mine and GeoSciences Bureau, (DENR-MGB), kon makakuha na kini sa Environmental Compliance Certificate alang sa sa gi-aplyan niini nga quarry site, ang Bohol na pinaagi sa Kapitolyo ang mo-isyu sa quarry permit, pasabut ni Col Malig-on.

Apan, giangkon sa BMinRRO nga bisan sa ilang hugot nga monitoring, may mga mohukoy og buhat sa illegal nga quarry, butang nga mahimong ika-alkanse sa mga barangay ug kagamhanan.

Ang illegal nga quarry maoy kina-ingnan sa kasagaran sa pagbaha, pagkahunlak sa yuta ug pagkadaut sa kalikopan kay kon dili madumala og maayo sa mga tinugyanan, mahimo kining tinubdan sa disgrasya ug tinuyo nga katalagman.

Segun sa ordinansa, ang barangay ug munisipyo diin mahimutang ang quarry, modawat og bahin sa buhis nga ibayad sa operator, samtang ang lain nga porsyento. Adto paingon sa panudlanan sa Bohol. (PIABohol)

AYAW PALIPAT. Daghan nga mosuway og himo og illegal nga quarry, mao nga angayan magbantay ang mga barangay officials aron dili malustan sa mga ilegalista. ANg matag makuga sa quarry, may bahin ang barangay mao nga mas maayo kon kini nga mga ilegalista, mapakgang, matud ni Col Malig-on. (PIABohol)