BAI nipasidaan: Ayaw gamit og 

rapid test kits alang sa rabies

TAGBILARAN CITY, Bohol (PIA)--Gitambagan sa Bureau of Animal Industry (BAI), agi og pagsunod sa World Organization for Animal Health (WOAH), ang publiko nga dili mogamit sa mga dili beripikado ug dili rehistradong “Rapid Test Kits” alang sa rabies.

Matud pa nga sa pagkakaron, wala pa’y rabies test kits nga aprubado sa Food and Drug Administration (FDA) sa Pilipinas.

Kini nga mga test, nga mogamit og laway o dugo ug mosaad nga may resulta dayon, dili masaligan ug dili luwas gamiton aron mahibaw-an kun may rabies ang usa ka hayop.

Nasabtan sa BAI ang pagmahal sa mga pet owner sa ilang mga alagang mga hayop ug ang tinguha nga makakuha dayon og tubag kun may mahitabong mapaakan o kun may mabantayan nga lahi nga sakit sa hayop. Apan pag-abot sa rabies, usa ka sakit nga halos kanunay ikamatay kun may sintomas na, mahinongdanon kun sakto ug sigurado ang resulta.

Base sa mga pagtuon, dili kanunay nga mogawas ang rabies virus sa laway sa hayop. Tungod niini, ang rapid test kits mahimong maghatag og sayop nga negatibong resulta (‘False Negative Results’), nga murag walay rabies ang hayop bisan naa diay.

Delikado kini tungod kay mahimong malangan ang dinalian nga pagtambal nga kinahanglan aron maluwas ang napaakan sa hayop.

Alang sa kaluwasan sa tanan, gigamit sa BAI ang pinaka-masaligang (‘Gold Standard’) nga paagi sa pagsusi sa rabies nga mao ang Direct Fluorescent Antibody Test (DFAT), kauban ang dRIT ug PCR. Ginasusi niini ang tisyu sa utok sa hayop ug naghatag og husto nga resulta.

Bisan nanginahanglan kini og patay na ang hayop, kini lamang ang mga pamaagi nga siguradong nakakumpirma sa rabies.

Gipahinumdoman usab sa BAI ang publiko sa Republic Act No. 9482 o Anti-Rabies Act of 2007, nga naglatid sa regular nga bakuna batok sa rabies, responsableng pag-atiman sa mga hayop ug pagkonsulta dayon sa lisensiyadong beterinaryo kun may insidente sa pagpaak.

Matud pa nga ang pagpa-test sa rabies gamit ang saktong pamaagi ginahimo og libre sa BAI-Animal Disease Diagnosis and Reference Laboratory (ADDRL) ug sa mga Regional Animal Disease Diagnosis Laboratory (RADDL).

Alang sa kaluwasan sa tanan, gitambagan ang publiko nga makipag-alayon sa ilang City o Municipal Veterinarian (LGU) alang sa saktong paggunit ug pagpadala og sample. Ang mga gibansay lamang nga kawani ang angay nga mokuha og specimen aron malikayan ang aksidenteng pagtakod.

Modawat ang BAI-ADDRL og mga saktong na-endorso nga sample 24 oras sa usa ka adlaw, 7 ka adlaw sa usa ka semana.

Kusganong gipahinumdoman sa BAI ang tanan nga dili mag-diagnose sa balay ug dili magsalig sa rapid test kits o uban pang dili beripikadong test. Alang sa kaluwasan sa pamilya ug sa komunidad, mokunsolta kanunay sa usa ka lisensiyadong beterinaryo. (ECB/PIA7-Bohol)

Matud pa sa BAI nga kini nga mga test, nga mogamit og laway o dugo ug mosaad nga may resulta dayon, dili masaligan ug dili luwas gamiton aron mahibaw-an kun may rabies ang usa ka hayop. (BAI/PIA-Bohol)