Prov’l Awards Committee

Sa LTIA ‘26, gireorganisa

TAGBILARAN CITY, Bohol (PIA)— Gi-reorganisa pinaagi sa usa ka executive order ni Gobernador Erico Aristotle Aumentado ang Lupong Tagapamayapa Provincial Awards Committee samtang magsugod na usab ang bag-ong round sa pagpangita sa mga sulondon nga mga Lupon nga apasidunggan.

Pinaagi sa Executive Order No 3, series of 2026 nga gilagdaan sa gobernador niadtong Pebrero 6, ang bag-ong mga sakop sa komitibas sa Lupong Tagapamayapa Incentive Awards (LTIA) Provincial Awards Committee mao ang mosunod: Chairperson: Johnjoan Mende, Provincial Director sa Department of Interior and Local Government; Vice Chairperson: Representante sa Department of Justice ug sakop ang representante sa Liga ng mga Barangay Bohol Chapter.

Ang Lupong Tagapamayapa (LT) maoy gihatagan og gahum sa paghusay sa mga kasamok ug kagubot sa barangay, aron mas mapadali ang pagdumala sa ka-angayan, subay sa Katarungang Pambarangay (KP).

Ang KP, namugna ubos sa Presidential Decree No 1508 aron pormal nga maghulma sa usa ka sistema nga paghusay nga gitamod sa mga panagbingkil sa barangay nga dili na masang-at pa sa korte.

Tungod sa KP, namugna ang LT nga mao usab ang nagpahimong malampuson sa Katarungang Pambarangay.

Tungod niini, s aka mahinungdanon nga tampo sa mga Lupon, subay sa Local Government Code, mahimo silang makakuha og insentibo, hinungdan nga natukod ang LTIA Provincial Awards Committee.

ANg provincial Awards Committee mao nay mopili ug magduso ngadto sa Regional Awards committee sa mga maayog performance nga Lupon sa Bohol samtang sila usab ang maghiusa sa mga ganti nga salapi o proyekto sa mga makadaug. (PIAbohol)