Gob Aris mipasalig: gipa-agi og

estriktong bidding ang bakuna;

mingmandu og imbestigasyon

TAGBILARAN CITY, Bohol (PIA)—Gipasalig ni Gobernador Erico Aristotle Aumentado nga ang tanan nga bakuna sa rabies nga gihatag gikan sa Department of Health (DOH) ug kadtong mga gipalit sa Bohol, ming-agi sa tukmang proseso nga hugot nga gipatuman isip pamaagi sa goberno.

Ang pasalig sa gobernador mitumaw taliwala sa gikabaniog nga nasibya nga pag-raid sa mga tinugyanan sa Food and Drugs Administration (FDA) ug sa Criminal investigation and Detection Group (CIDG) sa usa ka buhatan sa kaulohan nga nagpakita sa mga bakuna sa rabies nga wala sa tukmang sudlanan.

Wala pa usab masuta sa nahisgutan nga pag-raid kon ang mga bakuna tinuod ba gayud o himo-himo ra, apan gitataw sa CIDG ug FDA nga sa raid sa Taguig, wala silay nakit-an nga medical grade nga refrigerators.

Ang mga bakuna, kinahanglan nga adto tipigan sa sudlanan nga dunay kontrolado nga kabugnawon aron dili mamatay ang kagaw, ug mahimong walay epekto kini kon gamiton sa pamakuna.

Ang nahisgutan nga raid, didto sa usa ka balay, diin nakit-an ang mga bakuna nga gi-takos-takos, gawas sa bakuna sa rabies, may mga bakuna usab alang sa tetanus ug hepatitis, apan wala isulod sa tukmang bugnaw nga tipignan, subay sa cold-chain policy alang sa mga bakuna.

Nunot niini, gipadayag ni Aumentado nga ang mga bakuna nga gipalit sa Bohol, ming-agi sa estriktong proseso sa bidding, diin lakip sa mga rekisitos ang pagseguro nga ang supplier ug distributors, adunay valido nga License to Operate, ug may Certificate of Product Registration nga nabutang sa mga bakuna.

Kini nga mga matang sa napalit nga bakuna sa hugot nga proseso, maoy bakuna nga gigamit sa tanan nga Animal Bite Treatment Centers (ABTCs) nga gigamit sa mga ospital nga iya sa kagamhanang Probinsyal, matud sa gobernador.

Apan bisan pa niini, gipadayag usab ni Aumentado nga ang Provincial Health Office (PHO) ug ang Office of the Provincial Veterinarian (OPV) iya na nga gitugyanan sa paghimo og mga pagsusi ug imbestigasyon ug komprehensibo nga inspeksyon kalabut sa mga rabies vaccines nga gigamit sa tanan nga mga ABTC, nga gipadagan sa goberno ug sa mga pribado’ng institusyon.

Ang lakang gihimo aron maseguro ang kaluwasan, kalidad ug kaepektibo sa mga bakuna nga gihatag ngadto sa katawhan, dugang sa gobernador.

Apil sa mandu ngadto sa PHO ug OPV ang pagsusi sa tinubdan ug kalidad sa mga rabies vaccines, pagrepaso sa storage ug handling procedures, pagvalidate sa mga record sa pamakuna ug pag-imbestigar sa bisan unsa nga reklamoo insidente nga may kalambigitan sa bakuna.

Ug samtang ang imbestigasyon gipadayon, misaad ang gobernador nga ang resulta niini, ipahibawo dayon human kini marepaso, mao nga giaghat sa Kapitolyo ang tanan nga magpabilin nga kalmado ug makigtambayayong sa mga tinugyanan samtang nagpadayon ang imbestigasyon. (PIAbohol)

BAKUNA PARA SA IRO, PARA SA TAWO. Gipasusi ni Gob Erico Aristotle Aumentado ang mga bakuna nga anaa sa ABTCs sa Bohol, kini human ninggawas ang balita nga may possible nga mga hupas nga bakuna nga inosente nga gipangkuptan sa mga ABTCs aro itupok sa mga iro o sa mga napaakan sa iro. (PIABohol/PIMO)