ASEAN misagop sa kooperasyon sa

kadagatan, klima, mga kasabotan sa AI

TAGBILARAN CITY, Bohol (PIA)—Ang mga lider sa Association of Southeast Asian Nations (ASEAN) niadtong Biyernes nisagop sa pipila ka mahinungdanong mga kasabotan nga nagtumong sa pagpalig-on sa rehiyonal nga kooperasyon sa maritime security, climate action, disaster response, ug digital innovation.

Sa pagtaho sa resulta sa 48th ASEAN Summit ug Related Meetings sa Cebu, si Presidente Ferdinand R. Marcos Jr. miingon nga lakip sa mga dagkong dokumento nga gisagop mao ang ASEAN Leaders’ Declaration on Maritime Cooperation.

Atubangan sa lokal ug internasyonal nga media, si Marcos miingon nga ang Deklarasyon naglakip usab sa sugyot alang sa pagtukod sa usa ka ASEAN Maritime Center sa Pilipinas.

Ang deklarasyon nagpamatuod pag-usab sa kolektibong pasalig sa ASEAN sa pagpalawom sa maritime nga kooperasyon ug pag-ila sa multi-dimensional nga kinaiya sa maritime nga mga isyu, lakip na ang navigation safety, maritime security, ug regional coordination.

Gisagop usab sa mga regional leaders ang ASEAN Declaration on the Empowerment of Youth in Climate Action and Disaster Resilience, nga nagpasiugda sa papel sa mga batan-on sa climate-risk reduction ug disaster preparedness efforts.

Laing mahinungdanong resulta mao ang pagsagop sa ASEAN Leaders’ Statement on ASEAN Convergence in Disaster Response, nga nagpaila sa ASEAN Strategic Protocol for Emergency and Comprehensive Transformation (ASPECT) Framework nga gitumong sa pagpalig-on sa regional emergency coordination ug disaster response mechanisms.

Si Marcos miingon nga ang mga lider sa ASEAN miila usab sa nagkadako nga papel sa kabag-ohan, lakip na ang artificial intelligence ug digital tools, sa pagpalambo sa energy forecasting, food-system monitoring, ug social-protection delivery samtang nagsiguro nga kining mga teknolohiya magpabiling naka-angkla sa accountability ug international standards.

Gikutlo usab sa Presidente ang suporta sa Asian Development Bank alang sa mga programa sa ASEAN nga naglambigit sa regional connectivity, energy security, capital markets, food security, AI readiness, blue economy, social protection, ug public health.

Laing dakong kalamboan atol sa summit mao ang pagsagop sa Cebu Protocol to Amend the ASEAN Charter, ang unang amendment sa charter sa bloc sukad kini gilagdaan niadtong 2007.

Si Marcos miingon nga ang pag-amendar nagsuporta sa padayon nga ebolusyon sa ASEAN isip mas lig-on ug mas inklusibo nga rehiyonal nga komunidad ug nagpalig-on sa integrasyon sa Timor-Leste ngadto sa regional bloc.

Giila usab sa mga lider sa ASEAN ang pag-uswag sa mga haligi sa Political-Security, Economic, ug Socio-Cultural Community samtang ang rehiyon nagsugod sa pagpatuman sa ASEAN Community Vision 2045. (ECB/PIA7-Bohol)

Nagtigom ang mga lider sa ASEAN sa Cebu alang sa 48th ASEAN Summit Plenary nga gipangunahan sa Pilipinas. Gi-awhag ni Presidente Ferdinand R. Marcos Jr. ang mga miyembrong nasud nga maghiusa ug magtinabangay sa pag-atubang sa mga hagit sa rehiyon. (PIA)