PCA nagpatukod planta sa

puti nga kopras sa Mabini

TAGBILARAN CITY Bohol (PIA)— Aron motaas pa ang kalidad sa kopras nga itumod sa Bohol ngadto sa gawas sa nasud, sa dili madugay, sugdan na sa usa ka kooperatiba sa Bohol ang pagproseso sa lubi nga mahimo nga puti nga kopras.

Kini maoy gibutyag ni Philippine Coconut Authority provincial manager Jovencio Felisilda, samtang ang kasamtangan nga pamaagi sa pagkopras sa mga Bol-anong mag-uuma, anaa pa gihapon sa pagdangka o pagluto niini pinaagi sa pagpaaso sa landahan, o sa direkta nga pagbuwad sa adlaw.

Matud ni Felisilda, ang pagdangka ug ang pagbuwad sa gilugi nga lubi, magbutang sa koprasonon sa dili kontrolado nga environment, dili permi ang init, ug ang resulta, ang kopras mahimong brown, kuwang sa pagkaluto ug usahay usab iabut sa kapan-os.

Ang kopras, gibaligya sa gawas sa nasud alang sa pagkuha sa edible oil, sapaw o dessicated coconut, ug nga bio additives sama sa ibutang sa sabon.

Sa dili tataw nga pamaagi sa pagluto sa kopras, maoy kasagaran hinungdan nga ang kopras, tubuan sa kemikal nga makahilo ug maka-ingon sa kanser.

Ang dili maayo nga kalidad nga kopras maoy hinungdan nga dili makakuha ang mga mangoprasay sa tukma nga presyo, samtang daghan usab sa kopras nga dili makapasar sa international standard alang sa food grade processes.

Ug kay ang PCA maoy direktang natahasan sa pagpahibalik sa kalagsik sa industriya sa pagpanglubihan, gitutokan karon ang pasilidad nga makaproseso sa 5,000 ka lubi matag adlaw, aron himoon nga puti nga kopras.

Ang Aguipo Coconut Farmers Multi Purpose Cooperative, mingsaad nga kon makahunat na ang ilang planta, makapagawas na ang Bohol sa de kalidad nga puti nga kopras nga maoy kuhaan sa limpyo, walay baho ug maayong kalidad sa mga giproseso nga food grade nga mga produkto gikan sa lubi.

Niini usab nga panahon, mahimo nga ang mga mag-uuma sa lubi, dili na kinahanglang maghago pa, kay pwede na nga mabaligya ang tibuok lubi, sa mas maayong presyo aron makalahutay sa pagpadagan ang planta. (PIAbohol)

KOPRAS NGA RESECADA. Mas maayo nga pagkaluto tungod kay kontrolado ang kainit, ang puti nga kopras giila nga primera klase nga kopras nga magtanyag sa mas maayong presyo ug ang edible oil nga makuha niini, segurado kay walay amag, dili maka-ingon sa sakit sa lawas o makahilo. Ang planta sa puti nga kopras, matud sa PCA, anaa sa Aguipo Mabini, Bohol. (PIAbohol)