717 ka mga mag-uuma sa Bohol

makabenepisyo sa Mabini-Cayacay SRIP

TAGBILARAN CITY, Bohol (PIA)—Kinatibuk-ang 717 ka mga mag-uuma sa lungsod sa Mabini ug Alicia sa lalawigan sa Bohol ang makapaabot na sa mas kasaligang tubig, mas taas nga produktibidad sa umahan, ug mas maayong panginabuhian human sa inagurasyon sa P833.37 milyones nga Mabini-Cayacay Small Reservoir Irrigation Project (SRIP) niadtong Hunyo 22, 2026.

Gipangunahan ni Presidente Ferdinand R. Marcos Jr. ang seremonyas sa inagurasyon nga nagpamatuod pag-usab sa pasalig sa gobyerno sa paghatag gahum sa mga Pilipinong mag-uuma pinaagi sa padayon nga pagpamuhunan sa imprastraktura sa irigasyon ug modernisasyon sa agrikultura.

Gi-implementar sa National Irrigation Administration (NIA), ang proyekto gilauman nga makahatag sa tibuok tuig nga suplay sa tubig sa irigasyon sa 530 ka ektarya nga yutang panguma, nga makabenepisyo sa mga komunidad sa mga mag-uuma sa Barangay Abaca, San Roque, Aguipo, ug Cabidian sa lungsod sa Mabini, ingon man sa Barangay Cayacay sa lungsod sa Alicia.

Ang pasilidad sa irigasyon adunay 32.20 metros nga kataas ug 210 metros ang gitas-on nga dam, ungated ogee weir spillway, ug adunay 11.31-kilometros nga main canal nga gidisenyo aron episyenteng maghatud sa tubig sa irigasyon ngadto sa mga umahan.

Ang pag-inagurar dungan sa ika-63 nga Founding anniversary sa NIA, nga natukod niadtong Hunyo 22, 1963.

Sa iyang mensahe, si NIA Administrator Engr. Eddie G. Guillen miingon nga ang proyekto gituyo aron suportahan ang mga komunidad sa mga mag-uuma ug makatampo sa pagpalambo sa sektor sa agrikultura sa Bohol.

“Ang Mabini-Cayacay SRIP ay sagisag ng pag-asa, bunga ng pagtutulungan, at pamana ng kaunlaran para sa susunod na mga henerasyon. Sa bawat pagdaloy nito sa mga sakahan, kasabay nitong dadaloy ang pagkakataon para sa ating mga magsasaka upang magkaroon ng mas maunlad at mas masaganang kabuhayan,” matud pa ni Guillen.

Si Rito Muring, presidente sa Mabini-Cayacay Irrigators Association, niingon nga dako kini nga tabang sa kapin 700 ka mga mag-uuma nga kaniadto nagsalig sa tubig sa ulan aron maka-supply sa ilang mga umahan.

Ang Mabini-Cayacay SRIP nahimong kabahin sa programa sa pagpalambo sa irigasyon sa NIA nga gitumong sa pagpalapad sa coverage sa irigasyon ug pagsuporta sa produksyon sa agrikultura sa nasud. (ECB/PIA-7 Bohol)

Gipangunahan ni Presidente Ferdinand R. Marcos ang pagbukas sa marka sa P833.37 milyones nga Mabini-Cayacay Small Reservoir Impounding Project (SRIP) sa Barangay Abaca sa lungsod sa Mabini niadtong Hunyo 22, 2026. Ang Mabini-Cayacay SRIP nahimong kabahin sa padayong paningkamot sa Administrasyong Marcos nga ma-moderno ang sektor sa agrikultura, mapalapad ang serbisyo sa irigasyon, ug makab-ot ang long-term food security ubos sa panglantaw sa Bagong Pilipinas. (hulagway sa PCO)