Bohol magpadala og search & rescue team sa

Mindanao human sa 7.8 magnitude nga linog

TAGBILARAN CITY, Bohol (PIA)—Ang kagamhanang probinsiyal sa Bohol magpadala og Search, Rescue, and Retrieval (SRR) team gikan sa Provincial Disaster Risk Reduction and Management Office (PDRRMO) aron motabang sa mga response operations sa General Santos City human sa kusog nga linog nga miigo sa Mindanao niadtong Lunes, Hunyo 8.

Ang SRR team gilangkuban sa mga personahe nga adunay kahibalo ug kasinatian sa pagtubag sa kalamidad ug andam nga motabang sa search and rescue operations sa mga lugar nga grabeng naapektuhan sa mga kalamidad.

Sa usa ka Facebook post, gipahibalo ni Gobernador Erico Aristotle Aumentado nga ang probinsiya magpadala og mga personahe aron motabang sa nagpadayon nga emergency response efforts human ang magnitude 7.8 nga linog nga miigo sa lugar sayo sa Lunes sa buntag.

“Kabahin sa 7.8 magnitude nga linog sa Mindanao, magpadala kita og pito ka tawo nga PDRRMO SRR Team,” matud pa ni Aumentado.

Ang deployment sa Bohol kabahin sa pasalig sa probinsya sa pagsuporta sa mga komunidad nga naigo sa katalagman sa tibuok nasud pinaagi sa inter-provincial cooperation ug emergency assistance.

Si Presidente Ferdinand R. Marcos Jr. niadtong Lunes mimando sa tanang hingtungdang ahensya sa gobyerno nga muhimo og hinanaling aksyon nunot sa kusog nga linog nga miigo sa kadagatan duol sa Sarangani.

Ang Philippine Institute of Volcanology and Seismology (Phivolcs) nitaho nga ang linog maoy labing kusog nga miigo sa nasod karong tuiga.

Nasentro kini sa baybayon, gibana-bana nga 13 ka kilometro sa habagatan-kasadpan sa General Santos City, sa giladmon nga 10 ka kilometro.

Ang Phivolcs niingon nga ang linog namugna sa paglihok sa Cotabato Trench ug niigo alas 7:37 sa buntag.

Ang mga awtoridad nagpadayon pa sa pag-assess sa gidak-on sa kadaot ug posibleng aftershocks samtang ang mga lokal ug nasudnong ahensya nag-coordinate sa pagresponde ug relief operations sa mga apektadong lugar. (ECB/PIA-7 Bohol)

Ang deployment sa Bohol sa Search, Rescue, and Retrieval (SRR) team gikan sa Provincial Disaster Risk Reduction and Management Office (PDRRMO) ngadto sa Mindanao kabahin sa pasalig sa probinsya sa pagsuporta sa mga komunidad nga naigo sa katalagman sa tibuok nasud pinaagi sa inter-provincial cooperation ug emergency assistance. (ECB/PIA-7 Bohol)