Bohol nakadawat og mga materyales

sa pagtanom og ube gikan sa DA

TAGBILARAN CITY, Bohol (PIA)—Nakadawat ang lalawigan sa Bohol og mga materyales sa pagtanom og ube gikan sa programa sa Department of Agriculture (DA) ning bag-o lang.

Ang DA niapod-apod og 60,000 ka mga ube planting materials ngadto sa mga mag-uuma sa Bohol ug Leyte aron makatabang sa pagpalapad sa nagtubo nga industriya sa ube sa nasud.

Ang inisyatiba, nga gipatuman pinaagi sa Bureau of Plant Industry (BPI), nagtumong sa pagpausbaw sa produksiyon sa ube ug pagpataas sa kita sa mga mag-uuma samtang ang panginahanglan alang sa ani nagpadayon sa pagsaka sa lokal ug internasyonal nga mga merkado.

Ang P2.6-milyon nga proyekto nakabenepisyo sa dul-an sa 900 ka mga mag-uuma nga sakop sa kapin sa 60 ka organisasyon sa mga mag-uuma sa mga dagkong lugar nga naggama og ube sa Kabisay-an.

Sa lalawigan sa Bohol, ang mga nakadawat gikan sa mga lungsod sa Dagohoy, San Isidro, Lila, Cortes, ug Albuquerque.

Si BPI Director Glenn Panganiban miingon nga ang programa nagtinguha sa pagsiguro nga ang mga Pilipinong mag-uuma makabenepisyo gikan sa nagkalapad nga merkado sa kalibotan alang sa ube.

Matud pa ni Panganiban nga samtang ang ube nakakuha sa tibuok kalibotan nga pag-ila, kinahanglan nga sigurohon nga ang mga Pilipinong mag-uuma anaa sa posisyon aron pahimuslan ang mga oportunidad nga namugna niini.

Gidugang pa ni Panganiban nga ang inisyatiba nagbutang sa pundasyon alang sa mas taas nga produksiyon, mas maayo nga kita sa mag-uuma, ug mas lig-on nga domestic ube industry.

Ang DA miingon nga ang regular nga field monitoring ug validation nga mga kalihokan gihimo aron sa pagtimbang-timbang sa paggamit sa gipang-apod-apod nga mga materyales sa pagtanum ug pagkuha og feedback gikan sa mga mag-uumang benepisyaryo. Ang pagmonitor usab nagtumong sa pagsiguro nga ang tabang sa gobyerno makaabot sa gituyo nga makadawat ug makatampo sa dugang nga produktibidad ug kita sa umahan. (ECB/PIA-7 Bohol)

Aron makatabang sa pagpalapad sa nagtubo nga industriya sa ube sa nasud, ang Department of Agriculture niapod-apod og 60,000 ka mga ube planting materials ngadto sa mga mag-uuma sa Bohol ug Leyte ning bag-o lang. (ECB/PIA-7 Bohol)