Geographic indication alang sa

Bohol kinampay, gi-aplayan na

TAGBILARAN CITY Bohol (PIA)— Nadawat na sa Intellectual Property Office of the Philippines (IPOPHL) ang aplikasyon isip pagrehistro sa ubi kinampay sa Bohol isip geographical indication (GI), segun sa taho gikan sa nasampit nga buhatan.

Kon mahatagan sa pag-ila isip GI, ang Ubi Kinampay, makabaton sa labing gikinahanglang pagpanalipod sa pagkawala ug pagkapuo, kay nahimo na kining usa sa mga giilang duma nga kapanulundan ug magdugang sa agni sa Bohol sa mga turista ug mga eksperto sa siyensya.

Giduso sa Kagamhanang probinsyal pinaagi sa Bohol Economic Development and Investment Promotion Office (BEDIPO) nga usa sa mga buhatan ubos sa Buhatan ni Gob Erico Aristotle Aumentado, ang aplikasyon sa kinampay isip GI, nagtumong sa pagkuha og pormal nga pag-ila sa kalidad, reputasyon ug kulturanhong kapanulundan sa duma nga giisip usab nga balaan sa mga katiguwangan.

Gawas niini, ang kapiskay ug kalamian sa kinampay sa Bohol, mahimong may kalambigitan sa yuta sa Bohol, klima ug sa mga kinaraang pamaagi sa pagtanum niini.

Gawas nga may daghan na nga nakapatubo sa kinampay, ang klase sa kinampay sa Bohol may mas dagtum nga violet (tapol), kahumot nga manumbalay ug kapughad nga dili dali nga hingtupngan.

Gani, sa dugay na nga panahon, ang ubi kinampay sa Bohol mao nay giisip nga rayna sa mga ubi sa Pilipinas, mao nga permi nga gi-iliw sa mga giila nga tigluto sa mga international nga pagkaon.

Kun matugyanan sa GI, ang kinampay mahimong kapanalipdan sa mga pag-angkon sa ubang lugar ug gani sa paggamit sa uban sa pangalan nga kinampay, nga maoy makahatag sa dugang bili sa ubi gikan sa Bohol.

Nagtuo usab ang IPOPHIL nga niini, mapalungtad ang pagpang-ubihan u gang kinaraang pamaagi sa pagtanum sa mga guha, paggamit sa natural nga abono nga gituohang maoy makaingon sa talagsaong nga kinaiya sa Bol-anong kinampay.

Subay sa proseso sa registration, irepaso sa IPOPHL ang aplikasyon.

Kon mahatagan sa pag-ila, ang ubi kinampay maoy ikaduha nga GI dinhi sa Bohol, human sa Asin Tibuok.

Sa tibuok Pilipinas, upat pa lamang ang rehistradong GI: ang manga sa Guimaras, Piña sa Aklan, Asin Tibuok sa Alburquerque Bohol ug Tau Sebu T’nalak sa Tau Sebu (Lake Sebu) sa Cotabato. (PIAbohol)