Sa Fish Org sa Guindulman

DOLE mipundo’g P.5 M para

Pagpaundang sa child labor

TAGBILARAN CITY Bohol (PIA)—Sa susamang adlaw nga gisaulog sa nasud ang Kagawasan, gitugyan sa Department of Labor and Employment (DOLE) Bohol Field Office ngadto sa Isla Kuratan Fisherfolk Association, ang tunga sa milyon nga pundo suporta alang sa tibuok tuig nga panagatan, aron palingkawason ang mga kabataan sa Guinacot Guindulman sa kakuyaw sa kinabuhi nga mahimong makaguba sa ilang kaugmaon.

Dungan niadtong kalihukan, kauban sa 100 ka mga kabataan nga nasayran sa pagtuki sa DOLE nga anaa nahimutang sa peligro sa child labor, gisaksihan usab sa mga taga Anda, Bohol ang kampanya nga gidala sa DOLE ug sa Regional Council Against Child Labor ang child labor prevention ug elimination didto sa Anda Bohol, Hunyo 12.

Gawas sa kampanya aron undangon na ang pagpatrabaho sa mga kabataan sa mga bug-at nga buhat nga mahimong makaguba sa ilang kaugmaon, gihimo usab sa mga partner national government agencies ang service caravan nga nagbukas sa kahigayunan sa mga taga Anda nga makakuha sa frontline service sa goberno diha mismo sa ilang tugkaran.

Gipasabut ni Labor Employment Officer Atty. Reina Rachel Pestillos, kinsa maoy mingtunol sa P571,610.00 nga tseke ngadto sa mga opisyal sa kahugpungan, nga samtang may giisip nga child work nga nagpasabut sa mga gaan nga buhaton sa balay nga magbansay sa mga kabataan ngadto sa kakugi, pailub ug pagtamod sa trabaho, ang child labor nagtumbok sa mga bug-at na nga trabaho nga makadaut sa pag-eskwela, pagtubo ug paghulma sa bata ngadto sa usa ka maayong molupyo.

Dinhi sa mga kalungsuran sa Bohol nga duol sa dagat, may mga kaso pa gihapon sa mga banay nga dalhon ang mga bata sa panagat: gawas nga delikado ang trabaho sa bata, kasagaran apektado niini ang pag-eskwela sa kakapuy, ug ang kakuwang sa higayon nga ikaduwa ang mga sama niyag panuigon, maka-apekto sa personal nga pag-ugmad sa bata.

Tungod sa rasaon nga sama niini, matud ni DOLE Bohol livelihood development specialist Alfred Arcaya, nga gihatag sa DOLE ang dugang pundo sa gisugyot nga kalihukan sa mga ginikanan nga all season fishing activity.

Didto usab sa nasampit nga kalihukan, gipasabut s amga ahensya ang mga responsibilidad sa mga ginikanan, ang mga pamaagi sa pagsabut sa mga anak nga anaa sa teen-age, ug ang kamahinungdanon sa pagduwa alang sa mga bata.

Gitunol usab sa mga ahensya nga misalmot sa kalihukan ang mga school supplies ug mga pahalipay sa mga kabataan nga misalmot, sa Project Angel Tree. (PIABohol).

ANGEL TREE PROJECT. Sa mga kabataan sa Anda Bohol nga naprofile sa DOLE nga anaa sa risgo sa child labor, giapil sa kampanya sa kagamhanan ang mga ginikanan, ug alang sa pagseguro sa suporta sa ilang pag-eskwela, gihatagan sila og mga school supplies ug kiddie goodies, human sa kampanya batok sa child labor ug pagpugong niini, Hunyo 12 didto sa Anda Cultural Center, (PIAbohol)