CDA mipahinumdom:

Maga-pahat alang sa statutory

deduction gikan sa net surplus

TAGBILARAN CITY, Bohol (PIA)— Himoon nga batasan nga ibilin ang 30 porsyento sa net nga surplus alang sa upat ka statutory deductions, kini maoy pahinumdom sa Cooperative Development Authority (CDA) ngadto sa mga sakop sa mga kooperatiba.

Didto sa Kapihan sa PIA, gibutyag ni Jim Ryan Badayos, Cooperative Development Specialist sa CDA Bohol, kinsa mipasabut nga ang partida nga dili pagpabayad og buhis sa mga kooperatiba bisan sa ilang mga negosyo, may katumbas nga statutory deductions.

Subay sa Article 86 sa Philippine Cooperative Code of 2008, o ang Republic Act 9520, gimandu ang statutory deductions ug ang pagpahat nga gikinahanglan alang sa net surplus sa negosyo sa kooperatiba, matag tuig.

Subay sa nasampit nga statutory fund, gikinahanglan gikan sa net surplus magkuha og 10 porsyento alang sa reserve fund, ug dili mosobra sa 10 porsyento alang sa Cooperative Education and Training fund.

Magpahat usab og dyutay alang sa Community Development Fund, nga labing menos 3 porsyento ug optional fund nga dili molapas sa 7 porsyento

Gani, segun pa sa CDA, sa unang lima ka tuig nga pagkamugna niini, ang reserve fund kinahanglang katunga sa net surplus, o kita sa negosyo sa kooperatiba nga gikuhaan na sa pundo alang sa usa ka tuig nga operasyon niini.

Usa sa mga makapatay ug makabalda sa kooperatiba mao ang derecho nga pagbahin sa kinatibuk-an nga net surplus, diin wala nay magamit pa alang sa mga dinaliang galastohan ug mga laraw sa pagpalapad pa sa negsoyo, pasabut ni Badayos. (PIAbohol)

GIMANDU SA BALAOD SA KOOP. Katumbas sa kinatibuk-ang 30 porsyento sa net surplus sa ginansya sa kooperatiba nga negosyo, adto paingon sa gimandu sa balaod nga pundohan alang usab gihapon sa kooperatiba, p[as abut ni Jim Ryan Badayos sa CDA. (PIAbohol)