Mga kawani sa gobyerno nga nalambigit sa 

ilegal nga droga, gipasidan-an ni Duterte

MANILA, Mayo 23 (PIA)--Gipasidan-an ni Presidente Rodrigo Duterte ang mga sundalo, pulis, mga lokal nga opisyal, ug mga opisyal sa barangay nga sila ang unang matangtang sa serbisyo kun malambigit sila sa ilegal nga droga.

Sa iyang mensahe sa anibersaryo sa Philippine Navy, gi-angkon sa Presidente nga naglisod gihapon ang nasod karon sa pagsumpo sa ilegal nga droga.

Mao nga gitumbok niini nga angay matangtang ang mga miyembro sa pulisya, militar, ug lokal nga kagamhanan nga nalambigit sa droga.

Dugang pa ni Duterte, wala na’y atrasay ang iyang giyera kontra droga bisan pa bayolente ang iyang estilo.

Apan miingon usab ang Presidente nga suportado niya ang mga pulis ug sundalo sa pagbatok sa ilegal nga droga ug dili niya pasagdan nga mabilango sila taliwala sa pagpatuman sa ilang katungdanan.

Gipangunahan ni Duterte ang pagtimaan sa ika-120 nga anibersaryo sa Philippine Navy nga gipahigayon sa Coconut Palace sa Cultural Center of the Philippines (CCP) Complex sa kaulohan.

Highlight sa anibersaryo ang capability demonstration sa amphibious operations, counter terrorism ug hostage rescue sa Navy Special Operations Group ug Marines Special Operations Group, ug fleet review of vessels apil na ang fly by sa Naval Fixed and Rotary Aircraft kauban ang pinakabag-ong gipalit nga TC90S. (ecb/PIA7-Bohol).