Scholarship program sa GSIS alang 

sa SY 2018-2019, gibuksan na 

TAGBILARAN CITY, Mayo 21 (PIA)--Gibuksan niadtong Abril 16 sa Government Service Insurance System ang ilang pagpangdawat og aplikasyon alang sa GSIS Scholarship Program (GSP) alang sa Academic Year 2018-2019. 

Taman lamang sa Hunyo 15 ang pagpangdawat og aplikasyon alang sa mga gustong mahimong scholar sa GSIS alang sa mga kabos nga miyembro niini. 

Matud pa ni GSIS President Jesus Clint Aranas, 400 scholarship ang ihatag sa mga anak o dependents sa low-income GSIS member diin 40 niini ang gigahin alang sa mga dependents sa person with disabilities, indigenous peoples (IPs) ug solo o single parents. 

Ang mga kwalipikadong miyembro sa GSIS mahimong motuboy sa ilang anak o dependent sa scholarship kun incoming freshmen kini nga nadawat sa bisan asang 4 o 5 -year course o priority courses sa Commission on Higher Education (CHED)-recognized schools. 

Ubos sa GSP, ang GSIS ang moabaga sa actual cost sa tuition ug miscellaneous fees nga dili molapas sa P40,000 matag academic year sa 400 ka bag-ong scholars. Makadawat usab ang mga scholars og P3,000 nga binuwang allowance. 

May gitanyag usab nga monetary incentives ang GSIS nga P20,000, P30,000, ug P50,000 alang sa mga motapos nga scholars nga mo-gradwar nga may Latin honors cum laude, magna cum laude, ug summa cum laude. 

Ang mga anak o dependents sa mga aktibong miyembro ug anak sa permanent total disability (PTD) pensioners nga wala pa niabot og 60 anyos, mahimong ituboy niining scholarship program. 

Ang mga aktibong miyembro kwalipikadong mo-nominar og scholars kun permanente silang empleyado sa gobyerno nga nag-alagad na og dili moubos sa tulo ka tuig sa government service, may salary grade nga 24 o paubos (o sa equivalent job level niini), ug nakabayad na sa premium contributions sa milabay nga unom ka buwan. 

Ang mga ulitawo, dalaga ug minyong active members nga walay anak, mahimong mo-nominar og usa ka bata o dependent nga nagsalig kanila og suporta, samtang ang PTD pensioners ubos sa 60 anyos mahimong motuboy lamang sa ilang kaugalingong anak. 

Mahimong ma-download ang aplikasyon ug certification form gikan sa GSIS website nga www.gsis.gov.ph o mahimong mobisita sa pinakaduol nga buhatan sa GSIS. (ecb/PIA7-Bohol).