Girolando pa-ingon sa Bohol 

Dili sa Brazil apan sa Mexico 

TAGBILARAN CITY, May 21 (PIA)—Inay gikan sa Brazil ang mga baka nga girolando nga dalhon sa Bohol aron maoy gatasan ug ipaliwat sa pagpasanay sa mga baka dinhi, ang gikan sa Mexico na. 

Kini nga taho nakapalipay usab sa mga tig-alima og baka sa Bohol, kinsa nahadlok nga ang mga baka nga gikan sa Brazil, mahimong magdala og sakit nga Foot and Muth Disease (FMD) gikahadlokan sa mga mangalimag hayopan. 

Ang FMD gikaintapan nga sakit nga mananakod ug usahay makamatay ug kasagaran makaapekto sa mga hayopan nga cloven hoofed sama sa baka, kabaw, kabayo, kanding ug mga baboy. 

Dinhi sa Bohol, ug gani sa Pilipinas, walay kaso nga FMD nga namatikdan, ug gani bisan sa Brazil, walay kaso apan, ang nasud sa Brazil naghimo og pangbakuna nang daan aron kapanalipdan ang ilang hayupan sa sakit. 

Naguol ang mga Pinoy sa balita kay basin og mao kini ang kinaingnan nga makasulod na hinuon ang sakit nga FMD dinhi. 

Apan, gibutyag ni Provincial Veterinarian Stella Marie Lapiz nga sa labing bag-ong katikaran, gikan na sa Mexico ug dili sa Brazil ang mga baka nga kuhaon. 

Ang baka nga girolando, maoy numero uno nga baka kon gatasan ang estoryahan, matud ni Dairy Confederation of the Philippines chairman Isidro Albano. 

Kini liwat sa kanhi numero unong tiggatas nga Holstein ug Gir nga breeds, kansang kaliwatan maoy nag-una sa labing daghang gatas karon. 

Kon ang native nga baka ug kabaw mohatag sa 2 ngadto sa 4 ka litro nga gatas matag adlaw, ang girolando didto sa Brazil mapamatud-an nga mogatas og 40-42 litros matag adlaw, butyag ni Dr Lapiz. 

Sa labing bag-o usab nga resulta sa mga pagtuon nga gihimo sa Philippine Carabao Center dihang may nakuha silang baka nga gisakay sa ilang mga kabaw gikan sa gawas, ang girolando dinhi sa Pilipinas, mihatag og 22 litros kada adlaw. 

Ug aron pagpahupay sa kahingawa sa mga Pinoy, dili na sa Brazil kon dili sa Mexico kuhaa ang mga baka alang sa Bohol. 

Ang Mexico sama og kahimtang sa Bohol kon FMD ang hisgutan. 

Walay kaso sa FMD ang Mexico ug gani wala sila mangbakuna sa ilang mga hayupan batuk ning sakit. 

Ang nasudnong kagamhanan mitanyag sa laraw nga himoon ang Bohol nga maoy numero unong tinubdan sa gatas, og kini pinaagi sa pagpadala dinhi sa mga maayong klase nga baka. 

Sa tibuok nasud, 1 ka % lamang ang local nga gatas ug ang 99% nga panginahanglan gitubag pinaagi sa pagpamalit niini sa gawas. 

Gilaraw sa Department of Agriculture nga kunhoran ang import sa gatas sa nasud ug saplon na niini ang 10% nga panginahanglan sa gatas sa sunod tuig. (rahc/PIA-7/Bohol)