Sumbanan alang sa pagdeklarar 

og Comelec control, gipagawas na 

TAGBILARAN CITY, Mayo 9 (PIA)--Nagpagawas na ang Commission on Elections (Comelec) og sumbanan alang sa mga lugar nga kinahanglang ipaubos sa Comelec Control kalabot sa nagsingabot nga Barangay ug Sangguniang Kabataan Elections (BSKE). 

Ubos sa Comelec Resolution No. 10321, naghikyad ang poll body og mga basehan alang sa deklarasyon sa Comelec Control agi og pagsunod sa gipatuman nga mga balaod sa eleksyon. 

Kauban sa basehan ang mga mosunod: kun may kaagi o kun nakasinati og grabeng away ang manag-atbang nga partido nga posibleng maule sa bayolenteng hitabo; kun ang lugar gipaubos na kaniadto sa Comelec Control; kun may nasinating mga bayolenteng panghitabo tungod sa presensya sa mga private armed groups (PAGs); ug paggamit og mga loose firearms o dili lisensyadong pusil; 

Apil na usab kun adunay seryosong hulga ang New People’s Army (NPA), Bangsamoro Islamic Freedom Fighters (BIFF), Abu Sayaff Group (ASG), private armies ug uban pang grupo nga nalambigit kaniadto sa terorismo, pagpanikas ug iregularidad sa eleksyon, ug nahimong hulga sa gawasnon, malinawon, matinud-anon, hapsay ug katohuang eleksyon. 

Kun ipaubos sa Comelec Control ang usa ka lugar, may gahom ang poll body nga molahogay o mag-mando sa pagtangtang sa mga miyembro sa Philippine National Police (PNP); himuong deputized agency ang Department of Interior and Local Government (DILG); pag-balhin o pag-ilis sa pwesto sa mga opisyal ug kawani sa gobyerno nga molapas sa balaod sa eleksyon. (ecb/PIA7-Bohol).