Total deployment ban sa Kuwait, 

gibawi na ni Duterte 

MANILA, Mayo 17 (PIA)--Gibawi na ni Presidente Rodrigo Duterte ang total deployment ban sa Kuwait human sa kasabotan tali sa Pilipinas ug Kuwait kalabot sa proteksiyon sa mga overseas Filipino workers (OFWs). 

Matud pa ni Presidential Spokesperson Harry Roque, sa rekomendasyon ni Special Envoy to Kuwait Abdullah Mama-o, gimanduan ni Duterte si Department of Labor and Employment (DOLE) Kalihim Silvestre Bello III nga tangtangon na ang pagbawal sa pagpadala og mga OFWs sa Kuwait. 

Kining lakang sa gobyerno sa Pilipinas gihimo human sa pag-anunsiyo sa unang pagtangtang sa deployment ban sa mga skilled ug semi-skilled Pinoy workers sa Kuwait. 

Nagpasabot kini nga mahimo na usab magpadala og mga household service worker o domestic helpers sa maong nasod. 

Buwan sa Pebrero sa dihang gipatuman sa Presidente ang total deployment ban sa mga newly-hired OFW sa Kuwait tungod sa mga kaso sa pang-abuso apil na niini ang nakit-ang patay’ng lawas ni Joanna Demafelis nga gisulod sa freezer. 

Tungod niini, may mga gipahigayong negosasyon alang sa kasabotan sa proteksyon sa mga OFW apan nalangay kini tungod sa nikatap nga video sa pagluwas sa mga Philippine Embassy personnel sa mga distressed OFW. 

Gipadala ni Duterte ang pipila ka mga opisyal sa nasud sa Kuwait nga nagresulta sa paglagda og kasabotan alang sa dugang proteksyon sa mga OFW. (ecb/PIA7-Bohol).