DepEd mitataw: Korean 

language, dili ihulip sa Filipino 

TAGBILARAN CITY, Nov. 19 (PIA)--Gitataw sa Department of Education (DepEd) nga dili alisdan sa Korean language classes ang Filipino subject sa basic education curriculum (BEC). 

Matud pa sa opisyal nga pahayag sa buhatan, usa lamang ka elective o kapilian ang Korean language class ug dili parte sa core subjects sa BEC. 

Giingong itudlo lamang kini sa 700 ka tinun-an sa 10 ka mapiling junior high schools (JHS) sa National Capital Region. 

Gitumbok usab sa DepEd nga gawas sa Korean language class, may lima pa ka Special Program in Foreign Language (SPFL) classes ang kasamtangang gipatuman sa mga pampublikong tunghaan. 

Kini mao ang Spanish, French, German, Chinese ug Japanese classes. 

Kahinumdoman nga gi-ulan og pagsaway kining lakang sa DepEd human ideklarar sa Korte Suprema nga ‘constitutional’ ang pagtangtang sa Filipino ug Panitikan isip parte sa core college courses. 

Samtang gibutyag usab sa buhatan nga ang mga estudyanteng hanas lamang sa Filipino ug English ang kwalipikadong mokuha og Korean language elective class. (ecb/PIA7-Bohol)