Daan nga ‘stocks’ sa gasolina

wa'y labut sa 2019 excise tax

By Rey Anthony H. ChiuPublished on January 3, 2019

TAGBILARAN CITY, January 3, 2019 (PIA)—Kinahanglan una nga hutdon og dispatsar ang 2018 nga suplay sa lana ug gasolina nga naa sa sulod sa mga tangke sa gasolinahan sa dili pa ipasaka ang presyo sa  igtutubil subay sa ika duha nga hugna sa excise tax sa lanag sa produkto nga petrolyo sa 2019.

Kini maoy gipahinumdom ni Department of Energy (DOE) Secretary Alfonso G. Cusi samtang iyang gipanawagan ang mga industry players sa dili pagdali-dali sa pagpasaka tungod kay hugot kini nga gimonitor sa kagamhanan.

Ang DOE, uban sa Department of Finance, Bureau of Customs ug  sa Bureau of Internal Revenue, naglatid na og mekanismo aron hugtan ang pagbantay sa mga kasamtangan nga kompanya sa lana dungan usab sa pagpatuman sa ika duha nga hugna sa Tax Reform for Acceleration and Inclusion (TRAIN) lawsugod niadtong Martes, Enero 1, 2019.

Una na nga gibutyag ni Cusi nga andam na ang kagamhanan sa pagpatuman sa ika duha nga hugna sa TRAIN, nga magpatong og dugang nga buhis sa mga pili nga paliton sama sa produktong petrolyo sugod sa bag-o nga tuig.

Gipasabut ni Sec. Cusi, nga ila gayud nga gipaneguro nga ikapatuman sa husto nga paagi ang ikaduha nga hugna sa excise taxes, tungod kay ang buhis nga matigum gikan niini, magamit pagsuporta sa mga programa nga ‘Build Build Build’, libre nga matrikula ug tabang pagpatambaw sa mga Pinoy nga nanginahanglan.

Matud niya, “Sa pagpatong sa dugang buhisan, ato nga gipahugtan pa ang atong pagmonitor sa 2018 inventories sa mga oil companies aron atong kapanalipdan ang atong mga konsumidor gikan sa dili makatarunganon nga patigayon ug pagpaginansya sa panahon nga sugdan ang pagpadagan sa ikaduha nga hugna sa pagpadagan sa TRAIN.”

“Ang pagpamaligya sa karaan nga pundo sa 2018 subay sa nahimilin sa mga tangke sa gasolinahan niadtong Disyembre 31, wala pa maapil sa 2019 nga excise tax sa pasugod sa ikaduha nga hugna, mao nga dili angay buhisan kini.

Kon ipasaka dayon ang presyo sa mga produkto nga lana bisan kon ang karaan nga stock pa ang gibaligya, kini supak sa balaod ug dili lamang mahimong gukdon ang naghimo ug kasonan og administratibo nga silot sama sa pagsira sa estasyonan, mahimo usab nga kini ubanan sa kaso nga criminal sala sa large scale nga estafa, bahad ni Cusi.

Ang DOE, uban sa iya nga mga kaabag ug mga stakeholders, nagtanyag na usab sa mga pamaagi aron mapagaan ang epekto sa TRAIN Law sa iyang pagpatuman.

Kahinumduman nga may programa ang kagamhanan sa fuel discounts pinaagi sa corporate social responsibility ug mga programa sa promotion, pantawid pasada, pagpagawas sa energy efficiency tips, hugot nga monitoring sa mga gas stations pagseguro sa maayo nga kalidad ug gidaghanon sa gasoline nga gibayran sa pagpatubil. (rahc/PIA-7/Bohol)