Gran Fondo New York-Phil
himoon sa Bohol, Enero 27

TAGBILARAN CITY, Bohol, January 3, (PIA)—Sa imong tan-aw, kaya na ba nimo makig-lumba sa mga international nga siklesta ug hagiton sila, o interesado ka ba nga tupngan ug apson ang imong labing paspas nga sikad sa bisekleta? Nan, apil na.

Dili kay para nimo ra, apan agi og pagdugang og dani sa mga turista nga may pagkiling ngadto sa sports, buksan dinhi sa Bohol karong tuiga ang mga labing una nga lumba sa bisekleta nga maghatag sa mga mananaug sa pwesto aron ma-imbitahan sa gikaintapan nga Gran Fondo New York (GNFY), usa sa labing prestihiyso nga lumba sa bisekleta sa tibuok kalibutan.

Sukad niadtong inaugural nga lumba sa GFNY didto sa New York City, USA niadtong 2011, ang GFNY mipalapad na ngadto sa 20 ka mga lumba sa tibuok kalibutan.

Ug bisan kong ang GFNY giisip na nga labaing giila nga lumba sa bisekleta, ang GFNY dinhi sa Pilipinas anhi himoon sa Bohol karong Enero 27, 2019, diin ang mga siklista mogikan Bellevue Resort sa Panglao, paingon sa Loboc agi sa Corella, motungas sa Bilar subay sa lasang paingon sa Batuan, mosulod sa Makapko balik sa Hanopol, Balilihan, Corella, Baclayon balik sa Panglao.

Ang ruta nga 140 kilometros nga may tungason nga mokabat sa 1,554 metros gipaabut nga mahuman sa tulo nagdto sa 5 ka oras, segun pa sa mga tigpasiugda.

Niini nga lumba, kadto lamang makatapos sa 140 kilometros ang hatagan sa category ranking sa kinatibuk-ang ming-apil ug Podium awards. Ang labing una nga 10 ka siklesta nga makahuman sa ilang mga age catrogies, automatic nga moqualify sa lumba sa Racer Corral sa matag GFNY World event.

Alang sa mga ganahan usab nga moapil apan dili sa lumba, bukas usab ang medium nga rota nga 66 kilometris ug may 554 metros nga patungas.

Gikan sa Bellevue sa Panglao, ang mga siklesta mosubay sa Panglao central road, paingon sa Baclayon, saka sa Payahan ngadto sa Corella, sa mat Tarsier Sanctuary diin mobalik sa Corella, Baclayon ug Panglao sa gilay-on nga 66 kilometros.

Hinuon ang tanan nga siklesta hatagan sa ilang kaugalingon nga time chips ug segun sa makahuman sa ruta, may madawat nga rankings ug finishers medals.

Segun sa mga tigpasiugda, may kompleto nga aid stations sa lumba ug may mga technical support usab alang sa mekanikal nga mga suliran sa bisekleta.

Ang registration nagpadayon na, ug alang sa mga interesado, bisitaha ang www.gfnyph.com.

Ang GFNY gitanyag sa Department of Tourism, Tourism Promotions Board of the Philippines, Bellevue HOtels, Provincial Government of Bohol ug sa carrier Philippine Airlines. (rahc/PIA-7/Bohol)