Duty Free, gitakdang magbukas sa Bohol karong tuig

TAGBILARAN CITY, January 29 (PIA)--Nagplano ang Duty Free Philippines Corporation (DFPC) sa pagpalapad sa ilang operasyon sa Bohol karong tuig.

Sa usa  ka press briefing nga gipagigayon sa syudad sa Pasay ning bag-o lang, gipahibalo ni DFPC Chief Operating Officer Vicente Angala ang plano nilang pagpalapad sa ilang operasyon pinaagi sa pagbukas og mga bag-ong tindahan sa Bohol-Panglao International Airport ug sa Palawan karong tuiga.

Wala gibutyag ni Angala ang insaktong petsa sa pagbukas sa maong mga bag-ong Duty Free nga tindahan apan giingong sulod ning tuig kini gitakdang buksan.

Gidugang usab niini nga ang koordinasyon sa mga hingtungdang ahensiya sa gobyerno alang sa tindahan sa Bohol nagpadayon pa karon diin ang Department of Transportation (DOTr) pa ang nagdumala sa bag-ong airport sa Bohol.

Kun matugyan na sa DOTr ang Bohol-Panglao International Airport ngadto sa Civil Aviation Authority of the Philippines (CAAP), anha lang nila ma-pinalisar ang lokasyon sa ilang tindahan.

Sa pagkakaron, gipasabot ni Angala nga wala pa sila’y detalye kun unsa kadak-on ang maong tindahan nga ilang pagabuksan apan gipasalig niining mahitabo gayud kini karong tuig.

Kahinumdoman nga niadtong Nobyembre 27 sa niaging tuig lamang gibuksan ang Bohol-Panglao International Airport sa lungsod sa Panglao diin nitambong mismo si Presidente Rodrigo Duterte sa pagbukas niini. (ecb/PIA7-Bohol)

 

Gitakdang magbukas ang Duty Free Philippines Corporation (DFPC) sa Bohol-Panglao International Airport karong tuiga. (ecb/PIA7-Bohol)