Makabayan Bloc,

‘sayo namolitika’

TAGBILARAN CITY, Bohol, January 30 (PIA)—Sayo nga namolitika, kini maoy unod sa pagsaway sa Department of Interior and Local Government (DILG) pinaagi ni Assistant Secretary Jonathan Malaya sa mga kongresista nga sakop sa Makabayan Bloc sa paglangay sa labing gikinahanglan nga pagpahiuli sa Manila Bay.

Kahinumduman nga gisugdan ang unang hugna sa pagpahiuli sa Manila Bay niadtong Enero 27 nga giapilan sa libo-an ka katawhan nga namunit ug nanarap sa mga basura nga nahan-ok sa kadagatan ug kabaybayonan sa Manila Bay.

Ang Manila Bay, nga gisawhan sa 8 ka lalawigan ug 178 ka local government units sa 3 ka region, grabe na ang kahugaw ug gani, nagpagawas na ang Korte Suprema niadton 2008 pa, sa Writ of Continuing Mandamus alang sa DENR aron tabangon ang himatyon nga kalikopan didto. 

Ang continuing mandamus, usa  ka mandu nga giluwatas sa korte sa usa  ka kaso sa kalikopan, ug nagmandu sa usa  ka ahensya o opisyal sa kagamhanan sa paghimo sa mga gimbuhaton nga magtambal sa kakuwangon hangtud nga hingpit na nga masulbad ang kaso ng ipahiuli.

Niining bag-o lamang, gipatuman ang pagpahiuli sa Manila Bay, apan sa wala damha nga lakang, mingbabag ang nga sakop sa Makabayan Bloc ug nangayo og pag-oktaba sa gisugdan na nga lakang.

Giila sa rappler ang mga sakop sa Makabayan Bloc nga sila Alliance of Concerned Teachers Representative Antonio Tinio ug France Castro, Anakpawis Representative Ariel Casilao, Bayan Muna Representative Carlos Zarate, Gabriela Representative Arlene Brosas ug Emmi de Jesus ug Kabataan Representative Sarah Elago, nga nagpahunong sa pagpahiuli kay buot nilang i-agi una og konsultasyon ang paglimpyo sa Manila Bay.

Gawas sa mga basura nga gipatakag labay sa mga estero ug sa mga suba nga mogawas sa manila bay, may mga pribadong pabrika ug nga establisemento ang direktang naglabay sa ilang hugaw ngadto sa Manila bay.

 

Niini, matud ni Asec Malaya, “nagdagway og ang mga walhon sa Kongreso, mingdapig na usab sa mga dagkong negosyo nga may mga espesyal nga interes ug maapektohan sa pagpasira sa mganegosyo nga naghugaw sa Manila Bay.”

Namolitika, dugang ni Asec Malaya, kay hapit na usab ang partylist elections.

Inay pag-oktaba, mas maayo unta nga motabang na lang sa kagamhanan sa paningkamot niining ipahiuli ang naguba nga Manila Bay. Gipakita na sa Administrasyon ang politikanhon nga kabubot-on, kini na unta ang panahon nga ato na usab himoon ang atong kabahin,” komentaryo sa kalihim.

Buot nato nga hatagan og gibug-aton nga ang Manila Bay, kritikal na, ug dili na nato mahuwat pa ang laing us aka adlaw. Ang pagtubay sa reklamo sa Makabayan Bloc, mas mopagrabe pa sa sitwasyon, matud ni Malaya.

Ang pagpahiuli sa Manila bay, gawas nga gimandu na ni Presidente Rodrigo Duterte, gimandu na usab sa Korte Suprema niadto pang 2008 diha nga mipagawas kini og Writ of Continuing Mandamus sa DENR, ug sa DILG.

Niadtong Disyembre 18, 2008, mimandu ang Korte Suprema nagdto sa 13 ka ahensya sa kagamhanan sa sa paglimpyo, pagpahiuli, ug pagpreserbar sa Manila Bay, ug pagpabalik sa tubig sa kadagatan niini nga haum alang sa paglangoy, skin diving ug uban pang dagway sa contact recreation’,” si Malaya mipahinumdom.

Sa gipangayo sa Makabayan Bloc nga "comprehensibo ug nilukop nga pagtuon" ug "matuod nga programang demokratiko nga matinud-anon nga mopahiuli sa Manila Bay,” nasugdan na sa DENR ug DILG ug karon, kinahanglan nang ipatuman. (rahc/PIA-7/Bohol)