UCT mahimo na nga

P1200 sugod 2019 

TAGBILARAN CITY, Bohol, December 27 (PIA)-Sugod sa 2019, P1,200.00 na ang binuwan nga abag sa mga kabus sa naaud nga napailawom sa programa nga Unconditional Cash Transfer (UCT). 

Matud ni Department of Social Welfare and Development social worker Reymark Sendan, ang UCT maoy abag sa kagamhanan ngadto sa mga kabus nga senior citizens nga direkta nga naapektahan sa pagpatuman sa kagamhanan sa mga reporma sa ekonomiya sama sa Tax Reform Accelleration for Inclusion (TRAIN). 

Kahinumduman nga sa nanglabay nga mga buwan, may tag P1000 nga hinabang ang mga kabus gikan sa kagamhanan samtang padayon pang gipahiluna ang tukmang reporma sa ekonomiya nga magpaambit na usab sa mga kalipayon sa ekonomiya ngadto sa sektor sa mga kabus. 

Apan nakita na sa kagamhanan nga angayan nga madugangan pa ang tabang tungod usab sa napausab nga sistema sa pagpamalit sa pagpadagan sa TRAIN. 

Ang UCT, gitunol sa mga tinugyanan sa kagamhanan ngadto sa mga kabus, ka usa sulod sa tulo ka buwan, dala na usab sa panginahanglan nga hipnoon ang mga papeles balik sa kagamhanam nga magasuporta sa legal nga pagpagawas sa pundo, pasabut ni Serdan. 

Una nga tumong sa UCT mao kadtong mga tiguwang nga mas nanginahanglan, 60 ang edad pataas ug giila sa balaod nga kabus subayb usab sa Republic Act 9194 o ang nailhan nga Senior Citizens Law. 

Gidugang usab pagpasabut sa DSWD nga kon ang pagkahimo nga senior citizen, automatic niadtong moedad na og 60, dili pa maatul sa kagamhanan ang lukop nga paghatag sa tabang sa UCT sa tanan nga senior citizens. 

Sa UCT, gawas nga una sa prayoridad ang mga kabus nga senior citizens, gitutokan usab ang kadtong masakiton, nagluya ug huyang na, may pisikal nga kabilinggan, walay gisaligan nga pension gikan sa kagamhanan o pribado nga sektor, walay permanente nga tinubdan sa panginabuhian ug walay permanente nga suporta gikan sa mga kabanay. 

Ug tungod sa dyutay pa nga pundo, gibutyag ni Serdan nga niini, ang kadtong 80 anyos ngadto na sa centenarians ang unahon, ug kon nalukop na og serbisyo kini sila, adto na usab sa 70 anyos ngadto sa 79 ug katapusan nga prayoridad ang 60-69 ang edad. 

Tungod usab niini, giawhag sa DSWD ang mga senior citizens ilabi na kadtong nanginahanglan sa tabang, sa pagparehistro sa ilang tagsa tagsa ka munisipyo aron maapil sa mga Senior Citizens Associations diin ang abag sa kagamhanan gipasubay. 

Ug sanglit dili tanan ang makatagamtam sa tabang, matud ni Serdan nga ipahimutang sa waiting list ang mahimong ipasulod sa programa. 

Dugang niya, kon may dugang nga alokasyon nga aprobahan sa nasudnong kagamhanan sa UCT, kadtong naa sa waiting list na ang makatagamtam sa tabang. 

Mahimo usab nga kon may mabakante nga slot sa karon nakadawat apan miarang arang na ang kahimtang, mahilakip na usab sa programa. (rahc/PIA7/Bohol)