Human subhi ang Getafe, Sagbayan 

Guindulman-Dimiao NC, gibuksan 

TAGBILARAN CITY, Bohol, December 27 (PIA)—Sa katapusan nga semana sa Disyembre ug alang sa 2018, gikompleto sa Deparment of Trade and Industry ang upat pa ka pasilidad sa kagamhanan nga mag-abag sa mga mamumuhunan. 

Human opisyal nga gibuksan ang serbisyo sa Negosyo Center (NC) sa Getafe ug Sagbayan sa miagi nga semana, karong semanaha gibuksan usab ang NC sa Guindulman ug sa Dimiao, Disyembre 27. 

Ang NC Guindulman ug Dimiao, maoy nagsunod sa Getafe ug Sagbayan, nagpasaka sa upat na ka NC nga natukod sa Bohol ug maoy miangkon sa ika 15 ug 16 nga pwesto sa natukod nga ingon ani sa Bohol. 

Sa seremonyas nga personal nga gitambongan ni DTI Regional Director Asteria Caberte ug gitugbangan usab sa local nga mga tinugyanan pinangulohan ni Mayor Albino Balo sa Guindulman ug Danilo Guevancan sa Dimiao, kanunay nga gipahinumdom ni Caberte ang gikinahangalng kooperasyon sa kalungsuran sa pangandoy sa kagamhanan ang ipataas pa ang economic dynamism sa mga kalungsuran sa Bohol. 

Dungan usab niini, gisaad ni RD Caberte nga butangan og tukma nga tigtambag sa mga negosyante ang matag natukod nga NC aron matuman niini ang katuyuan nga makatabang pag-agak sa mga micro, small ug medium enterprises nga mas mougmad pa aron buhi-on pa ang local nga ekonomiya. 

Sa katungod ni Mayor Balo, sanglit ang Guindulman agi-anan ug napatung-an sa mga kalungsuran, ang natukod nga NC sa lungsod dako og ikaabag sa mga MSME sa mga kalungsuran usab sa Mabini, Candijay ug Duero, nga wala pay natukod nga NC. 

Niini, giaghat ni Mayor Balo ang iyang mga kapitan nga mingtambong usab sa pagbukas sa NG Guindulman, nga isugid kining maayong balita ug ipakatap sa kabarangayan, aron usab mahimuslan. 

Ang programa sa pagbukas sa Negosyo Center gisuportahan sa DTI sanglit kini na maoy mahimong responsible sa pagduso sa pagpasayon sa pagsugod ug pagpadagan sa negosyo samtang magbukas kini sa mga serbisyo ug tambag alang sa Micro, Small, ug Medium Enterprises (MSMEs). 

Ang pagtukod sa mga NC sa tibuok Pilipinas, gimandu usab sa Republic Act No. 10644 o ang nailhan nga “Go Negosyo Act,” nga buot mohatag og lig-on nga dugukan nga magpalig-on sa MSMEs aron usab makapasugod sa mga oportunidad sa kapanginabuhi-an. 

Sa gibuksan nga mga NC karong semanaha, mapaabut na sa mga gagmay nga mamumuhunan ang mga serbisyo sama sa pagpakonsulta sa negosyo ug pagpadangat sa mga pahibaw ug tambag, pagkuha ug pagtambag kabahin sa pagparehistro sa negosyo ug pagpalisensya niini, kalakip na ang mga paghimo og mga kampanya ug pagpakatap sa kasayuran kabahin sa negosyo ug pamuhunan. 

Matud ni DTI RD Caberte, “ang go negosyo act nagamandu sa tanang ahensya nga nagalangkub sa Micro Small Medium Enterprise Development (MSMED) Council sa pagpadagan sa mga programa nga mag-agak sa mga gagmay nga mamumuhunan.” (rahc/PAI-7/Bohol)