Balaodnong mo-proteher sa mga Gabaldon 

school buildings, gilagdaan na ni Duterte 

TAGBILARAN CITY, February 8 (PIA)--Gilagdaan na ni Presidente Rodrigo Duterte ang balaodnon nga nagmandato sa pagkonserbar sa mga Gabaldon school buildings sa tibuok nasud. 

Ang Republic Act 11194 gilagdaan ni Duterte niadtong Enero 18 nga nagtinguhang e-preserbar ang architectural, historical ug social significance sa mga Gabaldon school buildings ug heritage school houses nga gitukod sa Pilipinas gikan tuig 1907 ngadto sa 1946. 

Ang maong mga school buildings gi-disenyo sa amerikanong arkitekto nga si William Parsons ug gipundohan pinaagi sa Act. No. 1801 nga gisulat ni Isauro Gabaldon. 

Ubos niining balaod, tanang Gabaldon school buildings ilhon isip ‘built heritage’ ug busa, i-apil isip parte sa kulturanhong kabtangan ubos sa National Cultural Heritage Act of 2009. 

Gilatid sa maong balaod nga ang Department of Education (DepEd), sa koordinasyon sa National Commission for Culture and the Arts (NCCA), National Historical Commission of the Philippines (NHCP), ug National Museum, ang mo-implementar og programa alang sa idintipikasyon ug konserbasyon sa tanang Gabaldon school buildings sa tibuok nasud. 

Ang DepEd ug NCCA ang mopahigayon og imbentaryo sa tanang Gabaldon school buildings, maskin gigamit pa karon o guba na. 

Ang mga local government units (LGUs) nga adunay mga Gabaldon school buildings ubos sa ilang hurisdiksiyon, gimanduan usab sa pag-proteher ug pag-konserbar niining mga estraktura ug motabang sa DepEd sa pagpaningkamot sa pag-konserbar niini. 

Si Senador Loren Legarda, nga maoy nisulat niinng balaodnon miingon nga adunay 1,446 ka Gabaldon heritage school buildings sa tibuok Pilipinas. (ecb/PIA7-Bohol) 

Ang Dr. Cecilio Putong National High School (DCPNHS) dinhi sa syudad sa Tagbilaran ang usa sa mga Gabaldon school buildings sa tibuok nasud nga gimando sa RA 11194 nga gilagdaan ni Duterte nga tinguhang e-preserbar ang architectural, historical ug social significance niini. (ecb/PIA7-Bohol