Kampanyang pagpamakuna sa gobyerno 

gimando ni Duterte nga hingusgan 

MANILA, February 7 (PIA)--Gimando na ni Presidente Rodrigo Duterte nga hingusgan ang kampanya sa gobyerno sa pagpamakuna sa mga bata sa pagpanguna sa Department of Health (DOH). 

Gihimo sa Presidente ang maong kamanduan sa gipahigayong Cabinet meeting kagabii sa Malakanyang. 

Tungod niini, gi-isa na sa DOH ang measles alert sa tibuok nasud human usab sa deklarasyon sa buhatan og outbreak sa tipdas sa tibuok Metro Manila ug Rehiyon 3. 

Gipaabot ang pagdaghan pa sa mga kaso sa tipdas mao nga gi-isa na sa buhatan ang alerto sa tibuok nasud. 

Dungan niini, gipahibalo sa DOH nga nadugangan pa ang mga lugar nga may outbreak sa tipdas. 

Giingong gawas sa Metro Manila, nakatala na usab og pagsaka sa kaso sa tipdas sa pipila pa ka parte sa Luzon, Central ug Eastern Visayas. 

Tungod niini, nanawagan si DOH Kalihim Francisco Duque III sa mga ginikanan nga dili ihikaw sa ilang mga anak ang ka-epektibo sa bakuna ilabi na nga naa sa ulahi ang pagmahay. 

Kahinumdoman nga ning bag-o lang, mismong si Duterte na ang nanawagan sa mga ginikanan nga pabakunahan ang ilang mga anak sa nagkalain-laing immunization program sa gobyerno sama sa polio, hepatitis ug uban pa ug dili mahadlok taliwala sa kontrobersiya sa Dengvaxia vaccine. (ecb/PIA7-Bohol)