Pay rules sa Chinese new year, 

gipahinumdom sa DOLE 

TAGBILARAN CITY, February 6 (PIA)--Subling nipahinumdom ang Department of Labor and Employment (DOLE) sa mga pribadong employers nga mosunod sa holiday pay rules sa Chinese New Year nga gisaulog gahapon, Pebrero 5. 

Ang maong adlaw deklaradong special non-working holiday agi og pagsunod sa Proclamation No. 555 ni Presidente Rodrigo Duterte. 

Ubos sa Labor Advisory No. 15 nga gipagawas sa DOLE, angay nga bayaran sa mga employers ang ilang mga trabahante og dugang 30 porsiyento sa ilang inadlaw nga sweldo sa unang walo ka oras sa ilang pagtrabaho. 

Apan kun adunay overtime work o molapas sa walo ka oras ang trabaho, madugangan og 30 porsiyento ang iyang hourly rate sa maong adlaw. 

Samtang kun ang trabahante nisulod sa maong adlaw bisan ‘rest day’ niya kini, madugangan og 50 porsiyento ang iyang inadlaw nga sweldo sa unang walo ka oras nga pag-trabaho ug ipatuman usab ang dugang 30 porsiyento sa hourly rate kun molapas sa walo ka oras nga pag-trabaho. 

Ug kun wala nisulod ang trabahante sa maong adlaw, ipatuman ang ‘no work, no pay,’ nga prinsipyo gawas lamang kun adunay paborableng palisiya ang kumpanya nga gipatuman o collective bargaining agreement (CBA) nga maghatag og sweldo sa mga special non-working holidays. (ecb/PIA7-Bohol)