Kasaulogan sa National Arts 

Month sa Bohol, gibuksan

TAGBILARAN CITY, February 6 (PIA)--Pormal nang gibuksan ang kasaulogan sa National Arts Month sa lalawigan sa Bohol.

Gipangunahan kini nila Gob. Edgar Chatto, Tagbilaran City Mayor John Geesnell Yap II, Center for Culture and Arts Development (CCAD) head Romy Tagaan ug sa mga pinasidunggang dinapit nga sila Film Development Council of the Philippines (FDCP) president Liza Diño-Seguerra ug iladong director nga si Joel Lamangan pinaagi sa pagbukas sa mga visual arts didto sa Bohol Cultural Center ning syudad.

Ang maong mga visual arts hinimo sa mga Bol-anong visual artists nga sila Vincent Omar Dagdayan, Jeffrey Ronald Sisican, Marc John Israel ug Joseph Ingking.

Sa iyang keynote speech, si Diño-Seguerra miingon nga gisaulog nato karon ang ika-100 ka tuig sa Filipino cinema diin parte sa programa sa FDCP ang pag-amuma sa mga umaabot nga film makers pinaagi sa pagtanom sa binhi nga mao ang pagpahigayon og mga workshops ug trainings sa paghimo og maayong pelikula.

Gibutyag usab niini nga ang ahensya gitakdang molunsad sa FDCP film school – usa ka mobile school sa pakigtambayayong sa mga local government units (LGUs) sama sa Bohol ug syudad sa Tagbilaran kalabot sa basic film making nga maghatag og intensibong mga klase sa aspeto sa paghimo og pelikula.

Ang iladong director sa pelikula nga si Lamangan mi-ila usab sa ‘artist-friendly governance’ nga panag-ingnan sa Bohol ug syudad sa Tagbilaran diin matud pa niini nga ang kultura ug arte maoy kalag sa usa ka lugar.

Gidasig ang mga nitambong nga gilangkoban kasagaran sa mga estudyante, si Lamangan miingon nga ang mga materyales naa na sa Bohol mismo ug angayan kining ipasundayag sa kalibotan.

“The youth must write history and setting of Bohol,” matud pa ni Lamangan diin ni komiter kini sa pagtabang sa pagmugna og Bohol Film Commission.

Sa pakigtambayayong sa FDCP, ang lalawigan sa Bohol nakamugna na og Bohol Film Commission nga gipangunahan ni Lutgardo Labad.

Ang usa ka buwan nga selebrasyon sa arte mopatugbaw sa nagkalain-laing kalihokan nga mopasundayag sa 7 ka arte nga mao ang sayaw, musika, literatura, pelikula, pamalak, arkitektura ug visual arts.

Ang National Arts Month ginasaulog matag buwan sa Pebrero kada tuig base sa Presidential Proclamation No. 683 nga gilagdaan niadtong tuig 1991. (ecb/PIA7-Bohol)

Gibuksan nila Gob. Edgar Chatto ug FDCP President Liza Diño-Seguerra ang mga visual arts nga hinimo sa mga Bol-anong visual artists isip pagbukas sa kasaulogan sa National Arts Month sa lalawigan sa Bohol niadtong Pebrero 6, 2019 sa Bohol Cultural Center, syudad sa Tagbilaran. (hulagway sa EdCom-Bohol)