Mas simpleng ITR form, gipagawas sa BIR 

alang sa mga self-employed, professional 

TAGBILARAN CITY, February 4 (PIA)--Samtang nagkaduol na ang pagduso sa income tax return (ITR), nagpagawas ang Bureau of Internal Revenue (BIR) og mas simpleng form alang sa mga self-employed ug professional. 

Matud pa ni Rosario Chatto, tigpamaba sa BIR-Bohol, nahisulod kini sa Revenue Memorandum Circular No. 17-2019 diin nakalatid ang bag-ong BIR Form No. 1701A o ang Annual Income Tax Return for Individuals Earning Purely from Business/Profession. 

Tuyo niining bag-ong lakang sa BIR nga makuhaan ang kalisod sa mga self-employed, professional ug lakip na usab ang mga adunay freelance nga trabaho sa pagduso sa ilang ITR. 

Ang bag-ong ITR form nga 2 na lang ka pahina karon gikan sa 12 ka pahina, mahimo na usab i-file pinaagi sa online. 

Ang indibidwal nga adunay kita nga P3 milyon o mas ubos pa, kinahanglan lamang mag fill-out og 2 ka pahinang form samtang 4 ka pahina alang sa may kitang kapin sa P3 milyon matag tuig. 

Matud pa nga mahimo ang online filing sa bag-ong ITR form kun wala na’y payables o angay bayaran sa ahensya. 

Ang pagduso sa ITR gitakda sa mismong adlaw o dili pa ang Abril 15, 2019. (ecb/PIA7-Bohol)