Malakanyang miseguro: 

Presidente Duterte, nagpabiling himsog 

MANILA, February 4 (PIA)--Giseguro sa Palasyo sa Malakanyang nga maayo ang panglawas ni Presidente Rodrigo Duterte ug gitawag nga peke ang giingong balita nga patay na kini. 

Matud pa ni Presidential Spokesperson Salvador Panelo, hinimo lamang kini sa mga tawo nga dili madawat nga nagmalampuson ang presidente sa pagtuman sa mga reporma ilabi na aron taposon ang ilegal nga droga, korapsiyon, kriminalidad ug kagubot. 

Ang katuyoan lamang matud pa niining mga tawhana mao ang magsabwag og kahadlok sa kadaghanan sa mga Pilipino nga gusto ang dili ordinaryo apan epektibong matang sa pagdumala ni Duterte. 

Giseguro ni Panelo nga maayo ang panglawas sa presidente ug nagpahulay lamang kini sa iyang balay sa Davao tungod kay ‘hectic schedule’ na ang atubangon niini karong semanaha. 

Giingong sorry na lamang sa mga nanghinaot nga magkasakit ug nihimo og tsismis sa presidente. 

Apan nagpasalamat usab ang Malakanyang sa mga nag-ampo sa kahimsog ni Duterte aron matuman niini ang iyang mga gisaad alang sa nasud. 

Kahinumdoman nga mikatap ang pekeng FB page diin nakabutang nga patay na ang presidente human wala kini nakatambong sa Barangay Summit on Peace and Order sa Palo, Leyte niadtong Biyernes. (ecb/PIA7-Bohol)