Sa ika-32 anibersaryo sa ATI-7: Libreng seminar sa 

mushroom production ug processing nagmalampuson

TAGBILARAN CITY, February 1 (PIA)--Atol sa ika-32 nga anibersaryo sa Agricultural Training Institute-VII (ATI-7), malampusong gipahigayon ang libreng seminar kabahin sa Mushroom Production and Processing sa Island City Mall (ICM) Activity Center ning syudad, niadtong Enero 30.

Nagdala sa temang "Sustaining Vibrant Agricultural Productivity through Harmonized and Proactive Extension Service," ang maong seminar ang usa  sa mga kalihokan sa kasaulogan sa ika-32 nga anibersaryo sa buhatan.

Sanglit ang industriya sa mushroom o mas giila sa lokal nga tawag nga uhong, ang usa  sa labing maganansiyahon nga negosyo sa nasud karon ug tungod sa ekstraordinaryong banepisyo niini sa panglawas, taas kini karon og demand sa kamerkadohan.

May kinatibuk-ang 142 ka stakeholders, agriculture/mushroom enthusiast ug mga estudyante sa rehiyon ug benepisyaryo sa AMF ang nisalmot sa maong seminar.

Ang tag-iya sa Green Thumb Farm nga si Rona Denque, kansang mga produkto sa mushroom ginabaligya karon sa One Town, One Product (OTOP) sa ICM, ang mipa-ambit sa iyang kahibalo ug kaalam kabahin sa mushroom production ug processing.

Sa maong seminar, gipahigayon ang aktuwal nga hands-on sa preparasyon sa mushroom mother culture, sub-culture, bagging ug pagpananom sa mga fruiting bags ang gitudlo sa mga nitambong.

Gipahigayon usab ang aktuwal nga ‘cooking demo’ ug free tasting kun libreng pagpatilaw diin gi-showcase ang mga processed mushroom products sa Green Thumb Farm aron maghatag sa mga nitambong og ideya sa value-adding.

“As a mushroom grower practitioner, this seminar help boost our capacity, it enables us to learn its challenges and remedies that we may encounter in adapting this venture” matud pa ni Kathlyn Quion, usa  sa mga nisalmot sa maong seminar.

Gawas sa maong seminar, ang ubang kalihokan nga gipahigayon sa ATI-7 isip pagsaulog sa ilang ika-32 nga anibersaryo sa maong adlaw mao ang oath taking ceremonies sa mga bag-ong appointed ATI-7 nga mga empleyado; pag-ila sa mga dugay nang kawani pinaagi sa ATI loyalty awardees; contract signing tali sa 3N Construction alang sa katokoran sa bag-ong ATI -7 dormitory ug ang pagpasidunggog sa mga retiree nga gipahigayon usab sa ATI Regional Training Center, sa barangay Cabawan, ning syudad. (ATI-7/PIA7-Bohol)

Malampusong gipahigayon sa ATI-7 ang libreng seminar sa Mushroom Production and Processing sa Island City Mall (ICM) Activity Center, syudad sa Tagbilaran niadtong Enero 30, 2019 isip parte sa kasaulogan sa ika-32 nga anibersaryo sa buhatan. (ATI-7/PIA7-Bohol)