Mga Tagbilaranon, may ‘yellow phones’ 

nang magamit sa oras sa emerhensiya 

TAGBILARAN CITY, February 1 (PIA)--May magamit na karon nga pangtawag ang mga lumulupyo sa syudad sa Tagbilaran sa panahon kun adunay emerhensiya. 

Kini pinaagi sa ‘yellow phone’ nga gipamutang sa 12 ka LED boards nga makita sa mga nag-unang dalan sa nagkalain-laing mga lugar sa syudad. 

Gamit ang maong kolor dalag nga telepono, dili na kinahanglan pang mo-dial ang motawag, apan kinahanglan lamang kining e-pick up o puniton sa motawag ug awtomatiko na kining mokonektar sa Tagbilaran City Command Center. 

Ang maong mga ‘yellow phones’ gipang-taod sa mga LED boards nga nahimutang duol sa Tagbilaran City Hall mismo, City Square, Pook Pantalan, Causeway, Bool junction, Corner Ligason ug VP Inting Street. 

Makita usab kini duol sa Dao Barangay Hall, Dampas Barangay Hall, San Isidro Barangay Hall, CPG East duol sa Ace Hospital, Corner CPG North ug Uptown Ubujan ug duol sa merkado sa Manga ning syudad. 

Gilaoman sa kagamhanang syudad sa Tagbilaran nga pinaagi niini, dali nang maka-report ang mga residente kun adunay emerhesiya nga sitwasyon sa ilang lugar. (ecb/PIA7-Bohol) 

Pinaagi sa mga ‘yellow phone’ nga gipamutang sa 12 ka LED boards nga makita sa mga nag-unang dalan sa syudad, dali nang maka-report ang mga residente kun adunay emerhesiya nga sitwasyon sa ilang lugar. (Tagbilaran City Government)