Comelec, nipasidaan sa mga kandidatong 

di mosunod sa sumbanan sa pagpangampanya 

TAGBILARAN CITY, February 1 (PIA)--Nipasidaan ang Commission on Elections (Comelec) sa mga kandidatong dili mosunod sa sumbanan sa pagpangampanya. 

Matud pa sa tigpamaba sa Comelec nga si Atty. James Jimenez, angay siguradohon sa mga kandidato sa umaabot piniliay karong Mayo nga mosunod sa Comelec rules ang ilang mga campaign materials. 

Giingong angay nga ang sukod sa mga poster o tarpaulin naa sa ‘two feet by three feet’ ug angay nakabutang kini sa common poster area. 

Sa gipahigayong press briefing sa ulohang buhatan sa Comelec niadtong Miyerkoles, nipasidaan si Jimenez nga ang bisan unsang kalapasan sa sumbanan sa pagpangampanya ug ang usa ka electoral offence aduna gayud silot lakip na ang diskwalipikasyon. 

Nipasidaan usab kini nga bantayan usab sa Comelec ang airtime sa mga kandidato sa telebisyon man ug sa radyo. 

Gibutyag niini nga ang nasudnong kandidato aduna lamang 120 ka minutos o 2 ka oras matag estasyon sa telebisyon, samtang 180 ka minutos o 2 ka oras ug 30 minutos alang sa estasyon sa radyo. 

Alang sa mga lokal nga kandidato, may 60 minutos nga kinatibuk-ang airtime sila alang sa telebisyon, samtang 80 minutos alang sa mga estasyon sa radyo. 

Magsugod sa Pebrero 12 ang campaign period alang sa mga kandidatong modagan sa nasudnong posisyon samtang sa Marso 29 usab ang campaign period alang sa mga lokal nga kandidato. (ecb/PIA7-Bohol)