DENR manawagan sa paglimpyo 

Sa 10 ka suba sa Central Visayas 

TAGBILARAN CITY, Bohol, January 31 (PIA)—Nanawagan ang Department of Environment and Natural Resources (DENR) 7 ngadto sa kinabag-an nga katawhan’g Bisaya nga mo-apil ug manginlabut sa pagpahiuli sa mga ka suba-an dinhi. 

Karon’g umaabut nga Pebrero 22, Biyernes, napulo ka suba sa Tunga-tungang Kabisay-an ang gitumbok sa DENR-7 nga limpyohan. 

Tulo ka suba sa Sugboi, tulo sa Bohol, tulo sa Negros Oriental ug usa sa Siquijor ang hugopan sa mga moboluntaryo nianang adlawa. 

Sa Sugbo, ang suba sa Batuanon sa Mandaue, ang Bulacao River sa Bulacao ug ang Luyang River sa Carmen ang puntirya sa mga Sugbo-anon. 

Sa Bohol, ang Abatan River sa Cortes, Wahig River sa Inabanga u gang Manaba River sa Garcia Hernandez ang tabangan og limpyo. 

Sa Siquijor, ang Seora River sa Siquijor ang himoan sa pagpanglimpyo didto. 

Kini samtang ipatuman sa kagamhanan pinangulohan sa DENR ang dinungan nga pagpanglimpyo sa mga suba agi og pagsugod sa mga kalihukan sa pagpahiuli sa mga suba sa Tunga nga Kabisay-an. 

Ang pagpanglimpyo usab, agi og tampo sa mga Bisaya sa kasamtangan nga pagpahiuli nga gisugdan na sa Manila Bay. 

Kahinumduman nga una na nga gimandu ni Presidente Rodrigo Duterte ang pagpahiuli sa Manila Bay, ang daku nga katigayunan nga gisawhan sa daghang Local Government Units sa Metro Manila. 

Dala sa walay pagpakabana ug sa pag-abuso sa kalikopan, ang Manila Bay nagdagway og patay na nga dagat kay didto gilabugt ang mga basura ug nga hugaw gikan sa mga pabrika ug pribadong kompanya ugt kabalayan nga walay klaro nga awasanan sa hugaw nga tubig. 

Niadtong 2008 pa, gipagawas na sa Korte Suprema ang mandu ngadto sa DENR ug daghan pang mga ahensya sa kagamhanan sa pagsagop sa mga pamaagi sa pagpahiuli sa Manila Bay. 

Ang mandu sa Korte Suprema subay sa pagpatuman sa Philippine Clean Water Act of 2004. 

Sa laing bahin, agi og pagduyog, matud ni DENR 7 Regional Executive Director Gilbert Gonzales, “ato na nga nakita ang paglimpyo sa Manila Bay ug giunsa sa bagang katawhan nga miboluntaryo, sa paghimo sa dako nga kausaban karon.” 

Dinhi sa Central Visayas, ang kalimtang sa atong mga suba, dili kaayo lisud apan bisan pa, atong hugopan ug ipakita nga mahimo usab nato kining ipahiuli, dugang ni RD Gonzales. 

Dungan sa pagpanglimpyo, mipahinumdom ang DENR ngadto sa mga buot moapil nga dili mogamit sa mga surgical gloves nga kausa lamang gamiton unya ilabay ra usab. 

Gipahibaw usab nang daan sa DENR nga dili magdala sa mga plastic garbage bags, hinuon, sako aron magamit pa’g usab. 

Giawhag usag sa ahensya ang mga moboluntaryo sa pagsuot sa mga kalo aron mapanalipdan sa init sa adlaw alang nianang adlawa. (rahc/PIA-7/Bohol)