3-tuig nga proyekto pagpahiuli sa

kalikopan, ilusad karon’g palis na

TAGBILARAN CITY, Bohol, Sept 21 (PIA) –Usa ka proyekto sa pagpahiuli sa mga kakahoyan nga nadaut sa bagyong Odette ang tutokan sa One Meralco Foundation, Lokal nga Kagamhanan sa Pilar ug usa ka Non Government Organization sa Bohol, maoy tampo sa mga Bol-anon ngadto sa panawagan sa Simbahan sa pag-panginlabut sa Seasons of Creation.

Gawas pa niana, magtaban ang proyekto sa pagpasuga sa mga eskwelahan nga wala pay sumpay sa sugang dagitab, matud pa ni Aurelio Salgados Jr, executive director sa Participatory Research Organization of Communities and Education towards Struggle for Self Reliance (PROCESS).

Ang proyekto nga gitawag og One For Trees: Watershed Improved for Sustainable Environment (OFT:WISE) project 1 molanat sa tulo ka tuig nga pagpahilui sa mga kakahoyan sulod sa mga lugar nga kanhi sakop sa Department of Environment and Natural Resources (DENR) Integrated Natural Resources and Environment Management Project, lakip na usab ang mga kabakhawan ug katunggan nga gitamnan sa nungalon ug pagatpat sa lima ka mga kalungsuran sulod sa Carood Watershed nga may utlanan nga nagtamak sa dagat.

Ang mga kalihukan ug ang proyekto dinhi, dugang ni Salgados, maoy aktibo nga pagpanginlabut sa Bohol sa “Seasons of Creation,” ang higayon nga ang simbahan,s a pinulongan sa pagtuo, maghalad ngadto sa iyang katawhan sa pagbag-o sa iyang kalambigitan sa Dios nga magmumugna ug sa iyang mga minugna, pinaagi sa mga pagsadya, panaad sa pag-usab ug pagpaningkamot kauban sa kadaghanan sa pagpahiuli sa nagusbat nga kalibutan.

Gawas sa tulo ka mga bahan nga manguna sa pagpatuman sa proyekto, kini giapilan usan sa DENR PENRO, CENRO-Talibon ug sa Kagamhanang probinsyal pinaagi sa Bohol Provincial Environment Management Office (BPEMO).

Nunot niini, gipahibaw ni Salgados nga himoon ang OFT Bohol kick-off ug School Electrification program Turn-Over Ceremony ug Ceremonial Tree Planting karong palis, Septembre 21 sa may alas 2:00 ang takna didto sa Ceremonial Hall sa Kapitolyo.

Gipaabut nga mismo ang presidente sa One Meralco nga si Jeffrey Tarayao, maoy mopatin-aw sa dugokan sa proyekto, dungan usab sa pagtugyan sa mga donation sa One Meralco Foundation ngadto sa mag representante sa mga tunghaan nga benepisaryo sa ilang School Electrification Program.

Gipaabut nga mismo si Gobernador Erico Aristotle Aumentado ang manguna sa delegasyon sa Bohol sa maong kalihukan.

Siya kuyogan ni Schools Division Superintendent Bianito Dagatan, ug Jovencia Ganub sa BPEMO ug ni Salgados sa katungod sa PROCESS.

Lain nga susamang kalihukan usab ang himoon didto sa NIA Farmers Hall sa Pilar September 22.

Matud ni Salgados, ang OFT Bohol KickOff ug Community Gathering didto sa Pilar, magtapok sa mga mayor sa Pilar nga si Engr Wilson Pajo ug Ubay mayor Constantino Reyes kauban ni Kongresista Kristine Alexie Tutor, representante sa ika tulo nga Distrito sa Bohol. (RAHC/PIA_7/Bohol)

BUNGALON UG PAGATPAT. Mga bungalon lamang og pagatpat ang itanum sa proyekto sa OFT WISE kay kini subay sa siyentipiko nga sugyot nga dagkong kahoy aron mas makapanalipod sa kusog nga hangin og bawod, ilabi na sa mga bantang nga kabaybayonan sa mga kalungsuran sa Bohol nga nag-atubang sa kasubangan. (RAHC/PIA_7/Bohol)