Gob Aris: “One Meralco” kaabag sa

malungtarong pag-ugmad sa Bohol

TAGBILARAN CITY, Bohol, Sept 21 (PIA) –Tungod sa tabang niini ngadto sa pagpaduol sa Bohol sa iyang damgo nga malungtarong pag-ugmad, gipasalamatan ni Gobernador Erico Aristotle Aumentado ang One Meralco Foundation ug ilang Employees Association, sa mga hatag niini alang sa edukasyon ug pagpatunhay sa kalikopan.

Kini human gitunol sa One Meralco Foundation pinaagi sa president niini nga si Jeffrey Tarayao, kauban sa iyang Team, ngadto sa mga principal sa Gaus Elementary School, Juanito Paula Cruse Memorial High School sa Gaus ug Sa Maomawan High School ang solar power package nga maghatag nag sugang dagitab sa mga tulunghaan nga nahisgutan.

Kini kabahin sa School Electrification Program sa Foundation, kinsa midugang pa sa ilang libreng serbisyo sa koryente sa mga tunghaan nga naas sa mga sa Bohol ug walay gisaligang kasaligan nga tinubdan sa koryente.

Gitunol usab sa mga hingtungdan nga saila si Priscila Grafe sa Gaus Elementary School, Martha Niña Cutaran sa Juanito Paula Cruse High School ug ni Avelina Caparoso sa Maomawan Elementary School ang tagsa ka unit nga laptop computer, printer ug us aka LED TV, nga magamit sa eskwelahan sa ilang pagtudlo sa mga bata.

Ang bag-o nga suga nga dagitab mahimo lamang importante kon may TV ug laptop kini nga ikapares aron may mas mahinungdanon nga pagpatin-aw sa leksyon pinaagi sa multi-media, saysay ni Tarayao atul sa pagtugyan.

Mipalanug usab sa iyang pasalamat ang mga tinugyanan sa Department of Education Bohol Division pinaagi ni Superintendent Bianito Dagatan nagdto sa One Meralco, nga bisab wala silay negosyo dinhi, giapil gihapon nila sa ilang corporate social responsibility ang Bohol.

Matud ni Dagatan, ang tulo ka tunghaaan sa mga isla sa amihanang kasubangan sa Bohol nga nahatagan sa koryente maoy ika 18 sa sumada sa mga eskwelahan sa Bohol nga gisagop sa One Meralco.

Ang solar power sa mga eskwelahan nga hatag sa Meralco, usa ka limpyo nga tinubdan, ug kini usab haum sa paningkamot sa Bohol nga makapahimutang og kasaligang tinubdan sa enerhiya alangs aga komunidad.

Gawas sa kl Usa ka proyekto sa pagpahiuli sa mga kakahoyan nga nadaut sa bagyong Odette ang tutokan sa One Meralco Foundation, Lokal nga Kagamhanan sa Pilar ug upat pa ka local nga kagamhanan ug usa ka Non Government Organization sa Bohol, maoy tampo sa mga Bol-anon ngadto sa panawagan sa Simbahan sa pag-panginlabut sa Seasons of Creation.

Gawas pa niana, nagtaban usab ang ang proyekto sa One Meralco sa mga programa sa pagpahiuli sa kalikopan nga maghatabang sa kapin sa 200 ka mag-uuma ug 11 ka mga kahugpungan sa katawhan, matud pa ni Aurelio Salgados Jr, executive director sa Participatory Research Organization of Communities and Education towards Struggle for Self Reliance (PROCESS).

Kauban sa PROCESS, ang One For Trees: Watershed Improved for Sustainable Environment (OFT:WISE) project molanat sa tulo ka tuig nga pagpahiuli sa mga kakahoyan nga nangadaut sa bagyo nga Odette, kadtong nahisulod sa mga lugar nga kanhi sakop sa Department of Environment and Natural Resources (DENR) Integrated Natural Resources and Environment Management Project, lakip na usab ang sa lima ka mga kalungsuran nga nasulod sa Carood Watershed nga may utlanan nga nagtamak sa dagat, matamnan sa bungalon ug pagatpat.

Ang mga kalihukan ug ang proyekto dinhi, dugang ni Salgados, maoy aktibo nga pagpanginlabut sa Bohol sa “Seasons of Creation,” ang higayon nga ang simbahan, sa pinulongan sa pagtuo, maghalad ngadto sa iyang katawhan sa pagbag-o sa iyang kalambigitan sa Dios nga magmumugna ug sa iyang mga minugna, pinaagi sa mga pagsadya, panaad sa pag-usab ug pagpaningkamot kauban sa kadaghanan sa pagpahiuli sa nagusbat nga kalibutan.

Gawas sa tulo ka mga bahan nga manguna sa pagpatuman sa proyekto, kini giapilan usab sa DENR PENRO, CENRO-Talibon ug sa Kagamhanang probinsyal pinaagi sa Bohol Provincial Environment Management Office (BPEMO), kinsa maoy naghatag sa mga tumindok nga binhi sa karaang mga kahoy.

Nunot niini, gipahibaw ni Salgados nga himoon ang OFT Bohol kick-off sa Ceremonial Tree Planting, Septembre 22 sa may alas 2:00 ang takna didto sa National Irrigation Administraton Farmers Hall sa lungsod sa Pilar alang sa lima ka kalungsuran nga masulod sa programa. (RAHC/PIA_7/Bohol)

UBAY SA TUMONG SA KAUGMARAN. Gipadayag ni Gob Erico Aristotle Aumentado ang iyang pasalamat sa One Meralco Foundation kinsa, bisan wala pag negosyo nga nakuha sa mga Bol-anon, mipalakip sa lalawigan sa mga lugar nga ilang gitabangan. Ika 18 na ka eskwelahan sa mga isla sa Bohol ang gihatagan sa Foundation sa simpyo ug malungtarong supply sa solar nga koryente, ug magpanom pa usab kini og 100,000 ka kahoy nga kinahanglang mabuhi sulod sa tulo ka tuig. Makit-an sa hulagway si DepED Supt Bianito Dagatan, PIlar Mayor Engr Wilson Pajo, One Meralco president Jeffrey Tumayao, Gov Aumentado, BM Aldner Damalerio ug Aurelio Salgados Jr sa PROCESS Bohol. (Rahc/PIA-7/Bohol)

MAY KORYENTE NA. Gidawat sa mga principals sa Gaus Elementary School, Juanito Paula Cruse HighSchool ug Maomawan ES ang donasyon sa Meraclo Employees Association nga mga laptop, printers ug TV nga ilang magamits a eskwelahan human may koryente nga sila, gikan sa Meralco. Sila One Meralco president Jeffret Tomayao, GOv Aris, tulo ka mga principals ug Supt Bianito Dagatan mipakita sa mga pakapin sa Meralco School Electrification Program> (RAHC/PIA-7/Bohol)