COVID-19 vax card di na kinahanglan sa pagsulod sa Bohol

TAGBILARAN CITY, Bohol, September 22 (PIA)--Ang Panggamhanan sa Probinsiya sa Bohol mipahibalo niadtong Huwebes, Septiyembre 22, 2022, nga gilibkas na niini ang rekisitos sa pagpresentar sa COVID-19 vaccination card o certificate of vaccination alang sa mga asymptomatic nga byahedor sa probinsiya.

Si Gobernador Erico Aristotle Aumentado ni-isyu sa Executive Order (EO) No. 32 o gitawag nga “Lifting the Requirement to Present COVID-19 Vaccination Card or Certification for Asymptomatic Travelers to Bohol.”

Ang kamandoan "shall take effect immediately" o epekto dayon,” matod sa gobernador.

Ang EO gipirmahan niadtong Miyerkules, Septiyembre 21.

Samtang ang mga inbound nga mga byahero nga adunay mga sintomas sa COVID-19 kinahanglan gihapon nga magpakita og kard sa pagbakuna alang sa pagsulod. Kun wala niinii, sila gitambagan nga mangayo og medical nga interbensyon ug ibutyag ang personal nga impormasyon alang sa contact-tracing, si Aumentado miingon sa iyang EO.

"Relaxing the entry protocol to Bohol is one way of stimulating the local economy and start the march to economic recovery, (Ang pag-relax sa entry protocol sa Bohol maoy usa ka paagi sa pagpadasig sa lokal nga ekonomiya ug pagsugod sa martsa ngadto sa pagbangon sa ekonomiya)," matud pa ni Aumentado, diin gidugang usab niini nga ang mga kaso sa COVID-19 dili na ingon ka taas sama sa pagsugod sa pandemya.

Sa laing bahin, ang vaccination drive pagakusgan sa tanang lebel sa local government units sa Bohol, sumala sa kamanduan sa gobernador.

Base sa datos gikan sa Bohol Inter-Agency Task Force-Emergency Operations Center (BIATF-EOC), nikabat na sa 26,170 ka mga kaso sa COVID-19 ang natala sa lalawigan, diin 150 niini ang aktibo sukad Miyerkules, Setyembre 21. (ecb/PIA7-Bohol)

Ang Executive Order No. 32 nga gilagdaan ni Gob. Erico Aristotle Aumentado nga naglibkas sa entry protocol sa pagsulod sa lalawigan aron madasig ang lokal nga ekonomiya padulong sa pagbangon sa ekonomiya. (Provincial Government of Bohol FB)