‘Drug-cleared’ dili mapapas

bisag naay nadakpan didto

TAGBILARAN CITY, Bohol, Sept 26 (PIA) –Bisan pa kon drug cleared o drug free na ang usa ka barangay, dili madali-dali og kapapha ang iyang record isip napalingkawas gikan sa druga bisan pa kon may madakpan nga pusher o user sa ilang barangay.

Kini maoy gitataw sa Philippine Drug Enforcement Agency (PDEA) kinsa midugang sa pagpasabut nga daghan ang gibasehan sa PDEA sa pagclear sa usa ka barangay ug dili usab ingon niini kasayun ang pagbawi sa iyang naabut nga status kabahin sa drugas.

Sa saysay ni PDEA Intelligence Officer Michael Vargas, didto sa sinemana nga Capitol Reports, iya usab nga gipasabut nga mahimo nga ang nadakpan diha mismo sa sulod sa drug-cleared o drug free barangay, dayo lamang usab ug dili taga diha.

Ikaduha, gibutyag usab ni PDEA Intelligence Officer Maria Chona Egam nga bisan pa kon taga barangay ang nadakpan, kana lamang nagpasabut nga mingtrabaho ang local nga Barangay Anti Drug Abuse Council (BADAC) kay nakataho sa pagsulod sa bag-o o nibalik nga drug personality.

Parehas sila Vargas ug Egam nga ming-angkon nga ang suliran sa drugas, dili gyud maatul og atiman sa PDEA, busa subay sa balaod, ang pagpanginlabut sa tanan nga anaa sa komunidad, mao gayud ang labing gamhanang hinagiban batok niini.

Sa kasamtangan, miabut na sa 570 ka mga barangay sa Bohol ang drug-cleared samtang 17 na usab sa mga na cleared na ang gikadeklara nga drug free.

Ang pagdeklara nga drug free, gibasi usab sa kasamtangan nga mga parameters ug mga dokumento nga magpamatuod nga ang barangay nagpahimutang sa saktong mga suporta aron mapalayas na niini ang drugas.

Kini nga mga pagmatuod, gikan sa mga barangay, ipasa nagdto sa PDEA Bohol sa dili pa usab iduso ngadto sa Rehiyonal nga PDEA diin ditto magkatapok ang Regional Oversight Committee nga motimbangtimbang sa mga dokumento nga giduso nga nagpamatuod nga ang barangay, wala na gayuy impluwensya pa sagidili nga drugas.

Bisan pa, daghan pa gihapon sa Bohol ang nagsugod na usab ka hingawa tungod sa dagway’g mibalik ang hulga sa drugas, basis a kadaghanon sa mga madakpan ug sa kadagko na sa mga timbang sa drugas nga masakmit.

Nunot niini, namahayag si Capitol consultant on Peace and Order and Public Safety Arturo Evangelista nga suportado sa gobernador ang bugno batok sa illegal nga druga.

Matud niya, gimanduan na siya sa gobernador sa pagcanvass kon pila ang kantidad sa mga iro nga makamao mosimhot sa illegal nga drugal nga ipayuhot subay sa mga pantalan ug mga bus nga mosulod sa Bohol.

Laraw sa gobernador nga magbutang og mga drug-sniffing dogs sa mga pantalan sa Bohol, nga una na nga natumbok nga giagi-an sa drugas nga mingsulod dinhi. (RAHC/PIA-7/Bohol)

DILI DALI. Bisan pa kon ang barangay nadeklara na nga napalingkawas ug wala nay hulga sa drugas, dili dayun mapapas ang maayong dungog niini, tungod lamangs a nadakpan kay mahimo nga dayo ang mingsulod ug nag-operate didto, ug mahimo usab nga ang pagkadakop, maoy timailhan sa komunidad nga nagtinabangay aron makasumbong sa presensya sa katingad-ang tawo o katingad-ang lihok. (RACH/PIA-7/Bohol)