Wala nay kapasidad ang

CPP-NPA dinhi – 47IB

TAGBILARAN CITY, Bohol, Sept 26 (PIA) –Napulo na lamang ka armado ug 11 ka armas ang nahibilin sa mga Communist Peoples Party New People’s Army (CPP-NPA), ug wala nay kapasidad nga magsugod og kasamok.

Kini maoy gitaho sa mga tinugyanan sa 47th Infantry Batallion kinsa maoy nagtutok sa internal security operations sa lalawigan sa Bohol.

Didto sa sinemana nga Capitol Reports kabahin sa Peace ug Security sa Lalawigan, gibutyag sa 47IB pinaagi sa ilang Executive Officer nga si Major Jason Torino nga subay sa periodic reports status sa Bohol, gikan sa 18 ka armadong rebelled sa Bohol, 10 na lang sila karon.

As far as Bohol security is concerned, Bohol is almost insurgency free, buytag ni Maj Torino didto sa media forum.

Gani, sambat ni Bohol Police Provincial Director Osmundo Salibo, ang sitwasyon sa Bohol base sa Joint Letter Directive sa hepe sa Philippine national Police ug sa hepe sa Armed Forces of the Philippines, nabungkag na ang mga NPA sa Bohol ug wala na sila isipa nga hulga.

Gitumbok ni Col Salibo nga kon daghan pa ang mga NPA, ngano nga wala na may mga serbisyo samga kabarangayan nga napugngan pa sa mga hulga?

Ug sa ingon niini nga katikaran, mipalubad na usab ang mga tinugyanan sa Bohol sa modus nga gipakatag aron lamang makapangilad ug makapaninapi ang mga criminal.

Usa ka text ug call ang nagkatag karon sa Bohol, nga gikan kuno sa usa ka Kumander Regor nga kuno sakop sa Apolonio Mendoza Command, nga kuno, nag-operate sa may Tubigon Bohol.

Sa Tubigon Bohol usab nagkampo ang mga sundawo nga sakop sa Army Engineering Batallion, samtang nagkatag na usab ang signal sa cellphone didto mao nga sayon na lang isumbong ang mga katingad-ang tawo.

Ang style sa text o tawag sa magpaila nga Kumander Regor, nga mangayo sila og kwarta bugti sa kinabuhi sa us aka sakop sa pamilya.

Ang kwarta, kinahanglan nga ipadala pinaagi sa Palawan o GCash, ug ipadala dayun aron mapugngan pa ang pagpatay sa sakop sa pamilya.

Wala na’y kapasidad ang mga rebelde sa pagpaghadlok, ug kon aduna may ingon niini nga hitabo, hibaw-I nga kini mugna lamang sa mga criminal nga bout maninapi sa sayun nga paagi, matud pa sa mga tinugyanan sa Bohol.

Niining tanan, si Executive Assistant sa gobernador Evangelista, milangkob sa pag-anunsyo nga normal ang sitwasyon sa kahusay ug kalinaw sa Bohol ug ang sitwasyon, kaya ra nga dumalahon. (rahc/PIA-7/Bohol)

WALA NAY KAPASIDAD. Gikan sa 18 ka armadong rebelde, 10 na lang karon ug 11 na lang usab ang ilang armas, mao nga subay sa joint forces nga nagtutok sa Bohol, nalumpag na ang mga rebelled ug wala nay angay pang kahadlokan ang Bohol, matud pa ni Maj Torino sa katungod ni LtCol Allyson Depayso sa 47IB. (Rahc/PIA-7/Bohol)