Katre alang sa COVID

sa GCGMH puno na

CORTES, Bohol, Sept 28 (PIA)—Delikado na usab ang kahimtang sa Gov Celestino Gallares Memorial Hospital, kon hisgutan ang Coronavirus disease (COVID).

Sa labing ulahi nga taho sa Bohol Inter Agency Task Force on the Emerging Infectious Disease, ug subay sa gipakita sa Emergency Operations Center sa COVID sa Bohol, anaa sa kritical nga kahimtang sa tambalanan nga gitagana alang sa tanang sakit nga may simtomas nga gidudahang COVID.

Sa Septembre 28, sa may alas 10:00 sa gabii, puno na ang mga katre sa COVID0ICU, wala na usay bakante sa COVID ward.

Okupado na ang tanang pito ka mga COVID ICU Beds samtang puno na usab ang 43 ka katre nga ila untang ikahatag alang sa pasyente sa COVID.

Puno na usab ang 6 ka COVID Isolation beds, nga karon naa na sa critical Risk.

Pito sa napulo ug usa usab ka mechanical ventilators ang nagamit na, nga nagtimaan sa dili maayong kahimtang,

Gani, sa mga katre sa tambalanan nga gigamit na lang aron maatiman ang pasyente nga dili COVID ang sakit, okupado na ang 44 ka mga katre nga alang sa Intensive Care Unit.

Puno na usab ang 228 ka ward beds nga dili pang COVID.

Sa nasampit nga sitwasyon, buot unta sa kagamhanan ang pagpabolhot sa pagpamakuna kay kini lamang ang sa pagka karon, may tataw nga kasayuran nga makabuntog gayud sa COVID.

Apan, daghan pa gihapon ang mga senior citizens nga nagdumili sa pagpabakuna tungod sa kahadlok nga mamatay og sayo.

Matud pa sa mga mananambal, mas mamatay og sayo kon dili mabakunahan kay kon matapnasan na sa sakit, halos nag-ungaw nga ang way bakuna sa buho sa kamatayon, segun sa mga datus nga nakuha sa mga tambalanan.

Sa laing bahin, daghna gani usab ang nagtuo nga ang duha ka tupokan sa bakuna, igo nan ga panalipod.

Sa usa ka pagpakighinabi sa taga Department of Health, gibutyag ni Dr. Van Phillip Baton nga ang duha ka tupokan, mag higayun nga mohinay gayud ang panalipod, mao nga kinahanglan pa kini nga pakusgon pinaagi sa booster shot.

Tuyo sa kagamhanan karon nga paabton ang pagpangbooster sa katunga sa eligible population sa Bohol hangtud Oktubre 8, 2022. (RAHC/PIA-7/Bohol)

MENOS PA GIHAPON. Sa Katunga sa adlaw nga pagpahimutang sa mobile vaccination site didto sa Barangay San Vicente sa Dagohoy, 11 lamang ang ilang nabakunahan, ug gani, walay senior citizens nga nagpabakuna didto. Ang senior citizens natumbok nga labing nanginahanglan sa baluna aron makalahutay kon maCOVID. (PIABohol/foto RVO)